Bandaríkjamennirnir Max Homa, Scottie Scheffler og Bryson DeChambeau voru efstir og jafnir í forystunni á Masters-mótinu í golfi, fyrsta risamóti ársins, þegar blaðið fór í prentun í gærkvöldi.
Homa og DeChambeau voru báðir á sex höggum undir pari eftir tvo hringi á meðan Scheffler, efsti maður heimslistans, var á sex höggum undir pari þegar hann átti enn eftir að leika fimm holur á öðrum hring.
Homa hefur aldrei áður unnið risamót, en hann á best tíunda sæti á slíku á Opna breska meistaramótinu á síðasta ári. DeChambeau á einn sigur á risamóti, Opna bandaríska árið 2020. Scheffler er sömuleiðis með einn sigur á risamóti en hann vann einmitt Masters-mótið árið 2022.
Aðstæður á Augusta-vellinum í Georgíuríki í Bandaríkjunum voru nokkuð erfiðar og aðeins sex af sextán efstu kylfingum léku á undir pari vallarins í gær. Var skor kylfinga því nokkuð slakt í samanburði við fyrsta hring.
Svíinn Ludvig Åberg lék best allra í gær eða á 69 höggum, þremur undir pari. Hann er jafn í sjöunda sæti á tveimur undir.
Tiger Woods, sem hefur unnið 15 risamót á ferlinum, komst í gegnum niðurskurðinn með því að leika á 72 höggum í gær. Er hann á samtals einu höggi yfir pari og jafn í 22. sæti. Er um mikið afrek að ræða fyrir Tiger að komast í gegnum niðurskurðinn en hann hefur verið að glíma við þrálát meiðsli og keppir lítið um þessar mundir.