Sérfræðinganefnd Lyfjastofnunar Evrópu (EMA) um eftirlit með ávinningi og áhættu lyfja (PRAC) hefur komist að því að ekki eru óyggjandi sannanir fyrir því að orsakasamband sé á milli notkunar mRNA-bóluefnanna Comirnaty frá BioNTech/Pfizer og Spikevax frá Moderna og blæðinga. Svo segir í tilkynningu frá Lyfjastofnun Íslands.
Lyfjaöryggisnefndin, sem fundaði í upphafi mars, fór yfir öll fáanleg gögn um hugsanleg tengsl mRNA-bóluefna við blæðingar eftir tíðahvörf, þar á meðal fræðigreinar, og tilkynningar vegna gruns um aukaverkanir sem bárust eftir að bóluefnin voru tekin í notkun.
PRAC mun áfram fylgjast grannt með öllum upplýsingum sem varða þetta mál í gegnum hefðbundna lyfjaöryggisferla EMA.