Norður
♠ Á74
♥ D3
♦ D1093
♣ ÁKG9
Vestur
♠ K10862
♥ ÁK1064
♦ G2
♣ 2
Austur
♠ –
♥ 98
♦ K854
♣ 10876543
Suður
♠ DG953
♥ G752
♦ Á76
♣ D
Suður spilar 4♠ doblaða.
Sveitin Volcanes gerði það gott í Cali í Kólumbíu í síðustu viku – varð í fjórða sæti af 46 sveitum í alþjóðlegu stórmóti. Og hvað með það? Ja, bara það, að helmingur sveitarinnar var skipaður eldspúandi Íslendingum, þeim Gunnlaugi Karlssyni og Júlíusi Sigurjónssyni. Hinn helmingurinn var frá Síle – Roberto Garcia og Enrique Garcia Huidobro.
Fyrst var umferðakeppni í fjóra daga, þar sem Volcanes-sveitin vann sér rétt til að spila til úrslita í tvo daga. Andstæðingar þeirra í átta-liða úrslitum voru heimsþekktir Pólverjar í sveit Reese Milners og bjuggust fáir við að eldfjöllin ættu séns í þau ofurmenni. Annað kom á daginn. Hér opnaði Júlíus í vestur á 2♥ (5-5 í hjarta og öðrum), Krzysztof Buras doblaði, Gunnlaugur passaði og Jacek Pszczola stökk í 4♠. Dobl hjá don Julio, 500 niður og gott innlegg í 13 stiga sigur (94-81).