Alþjóðaheilbrigðisstofnunin, WHO, lýsti í gær yfir þungum áhyggjum af útbreiðslu H5N1-gerðar fuglainflúensu, sem hefur að undanförnu borist í vaxandi mæli í spendýr.
Fuglaflensufaraldurinn hófst árið 2020 og hefur valdið dauða tuga milljóna alifugla víða um heim. Villtir fuglar hafa smitast af veirunni og einnig land- og sjávarspendýr. Í mars greindist fuglaflensa einnig í kúm og geitum, sem kom á óvart.
Jeremy Farrar, vísindamaður hjá WHO, sagði á blaðamannafundi í Genf í gær að helsta áhyggjuefnið væri að veiran myndi þróast og sýkja fólk og jafnvel smitast milli manna.
Til þessa eru engin dæmi um að H5N1-fuglaflensuveiran hafi smitast milli fólks en fólk hefur smitast af fuglum eða dýrum. Farrar sagði að dánartíðnin væri mjög há. Frá apríl árið 2003 til 1. apríl á þessu ári hefur WHO skráð 889 tilfelli í 23 löndum þar sem fólk hefur smitast af fuglaflensu og þar af hefur rúmlega helmingur látist. Farrar sagði að verið væri að þróa bóluefni og meðferðir gegn H5N1.
Matvælastofnun varaði í gær við vaxandi hættu á fuglainflúensu með komu farfugla hingað til lands með vorinu. H5N1-gerðin hefur ekki greinst hér. Síðast greindist fuglaflensa hér í nóvember 2023 en þá fundust skæðar fuglainflúensuveirur af gerðinni H5N5 í hröfnum á Selfossi og í Mýrdal.
Til baka
Leita í greinasafni
Prenta grein