Kosning utan kjörfundar erlendis vegna forsetakosninga 1. júní 2024 hefst 2. maí og fer fram skv. ákvæðum 70. gr. laga um kosningar til Alþingis. Kjörstaðir eru allar sendiskrifstofur Íslands (nema fastanefnd hjá NATO í Brussel), aðalræðisskrifstofur í Winnipeg, Þórshöfn og Nuuk og hjá kjörræðismönnum, að því er utanríkisráðuneytið greinir frá.
Fram kemur í tilkynningu að kjósendum sé ráðlagt að hafa samband við sendiskrifstofur og kjörræðismenn og bóka tíma eftir samkomulagi til að kjósa. Á vef utanríkisráðuneytisins megi finna upplýsingar um sendiskrifstofur Íslands og kjörræðismenn eftir löndum.
Á Ísland.is er birt upplýsingaefni bæði á íslensku og ensku.