Stefán Gunnar Sveinsson
sgs@mbl.is
Volodimír Selenskí Úkraínuforseti þakkaði í gær Joe Biden Bandaríkjaforseta fyrir óbilandi stuðning sinn, en leiðtogarnir ræddust við símleiðis eftir að fulltrúadeild Bandaríkjaþings samþykkti frumvarp um hernaðaraðstoð við Úkraínu um helgina.
Biden tjáði Selenskí í símtalinu að hann muni undirrita frumvarpið sem gildandi lög um leið og öldungadeild Bandaríkjaþings samþykkir það, en gert er ráð fyrir að deildin taki frumvarpið til umræðu og afgreiði það í þessari viku. Hafa talsmenn bandaríska varnarmálaráðuneytisins sagt að þá muni ekki líða á löngu þar til fyrstu sendingarnar berist til Úkraínu.
Frumvarpið kveður á um að Bandaríkin verji á þessu fjárlagaári um 60,1 milljarði bandaríkjadala, eða sem nemur tæpum 8.500 milljörðum íslenskra króna, í hernaðaraðstoð til Úkraínu. Höfðu Bandaríkin áður varið samtals 46,3 milljörðum bandaríkjadala í aðstoð við Úkraínuher, og er því um umtalsverða aukningu að ræða.
Það tók hins vegar um hálft ár að ná frumvarpi um endurnýjaða aðstoð í gegnum fulltrúadeild þingsins, og hefur sú töf þýtt að Bandaríkjastjórn hefur ekki getað sent Úkraínu mikilvægar vistir og skotfæri síðustu mánuði, á sama tíma og Rússar hafa búið sig undir sóknaraðgerðir í sumar.
Kíríló Búdanov, yfirmaður leyniþjónustu Úkraínuhers, HUR, sagði í gær í viðtali við breska ríkisútvarpið að líklegt væri að ástandið á víglínunum muni versna enn fyrir Úkraínu á næstu vikum, þar sem Rússar væru nú farnir að þrýsta verulega á varnarstöður Úkraínuhers í austurhéruðum landsins, en þeir sækja nú einkum að bænum Tsjasív Jar.
Búdanov tók fram að staðan væri ekki örvæntingarfull og að Rússar myndu ekki ná að knýja fram sigur í stríðinu. Hins vegar mætti ætla að frá miðjum maí og fyrstu vikurnar í júní verði staðan erfið fyrir Úkraínumenn.
Samkvæmt stöðumati bandarísku hugveitunnar Institute for the Study of War má eiga von á því að Úkraínuher muni enn þurfa að hörfa næstu vikur, þar til skotfæri frá Bandaríkjunum og Evrópu geta borist í nægu magni til þess að stöðva sókn Rússa.