Jóhann Bjarnason fæddist í Vestmannaeyjum 14. október 1956. Hann lést á líknardeild Landspítalans 6. apríl 2024.

Hann var sonur hjónanna Bjarna Helgasonar, f. 26. júlí 1927, d. 10. febrúar 2013, og Helgu Sigríðar Sigurðardóttur, f. 10. nóvember 1929, d. 14. apríl 2022. Jóhann átti einn bróður, Guðmund Bjarnason, f. 7. júní 1962, d. 4. apríl 1963.

Jóhann var giftur Björk Högnadóttur, f. 16. mars 1958, en þau skildu. Þau eignuðust saman tvö börn, þau eru: Helga Diljá Jóhannsdóttir, f. 28. júlí 1984, og Bjarni Jóhannsson, f. 3. júní 1982, giftur Lindu Björk Ólafsdóttur, f. 26. maí 1987, börn þeirra eru Fanney María, f. 4. desember 2011, og Benedikt Jón, f. 17. apríl 2015.

Önnur sambýliskona Jóhanns var Anna María Agnarsdóttir, f. 4. maí 1963. Leiðir þeirra skildu. Þau eignuðust saman tvíbura: Gunnar Bjarki, f. 7. desember 1994, sambýliskona hans er Sædís Birna Sæmundsdóttir, f. 21. janúar 1995, og saman eiga þau soninn Hinrik Óla, f. 24. febrúar 2024. Kristinn Ómar, f. 7. desember 1994, giftur Söndru Ólafsdóttur, f. 2. júlí 1992, og saman eiga þau soninn Bjart Mána, f. 18. mars 2022.

Þriðja sambýliskona Jóhanns var Inga Davíðsdóttir, f. 17. febrúar 1959, d. 26. október 2009. Saman áttu þau dótturina Helgu Rún, f. 27. desember 2001. Jóhann gekk í skóla í Vestmannaeyjum en að grunnskólagöngu lokinni réði hann sig til Landhelgisgæslunnar 16 ára gamall sem messagutti en síðar átti hann eftir að starfa hjá gæslunni sem háseti. Hann stundaði nám við Stýrimannaskólann og lauk þaðan 3. stigi árið 1979. Á starfsævi sinni starfaði hann sem stýrimaður hjá Eimskip, Samskipum og Herjólfi.

Jóhann bjó meirihluta ævi sinnar á höfuðborgarsvæðinu en tilfinningar hans til Vestmannaeyja voru alltaf sterkar. Hann hafði alla tíð mikinn áhuga á skipaflota landsins og þá sérstaklega skipaflota Landhelgisgæslunnar. Sem gutti hélt hann ítarlegar skipaskrár og tók daglegar gönguferðir um höfnina eftir skóla í Vestmannaeyjum, á síðari árum breyttust þessar ferðir í hafnarrúnta um hafnir höfuðborgarsvæðisins.

Útför Jóhanns fer fram frá Lindakirkju í dag, 23. apríl 2024, kl. 13.

Eyjapeyinn, stýrimaðurinn og heiðursmaðurinn Jóhann Bjarnason hefur leyst landfestar í hinsta sinn. Hann kvaddi þetta jarðlíf á líknardeild Landspítalans eftir skamma legu, umvafinn ást og umhyggju barna sinna.

Við hjónin kynntumst Jóhanni um aldamótin, þegar hann kynntist Ingu, systur og mágkonu. Hann hafði þá þegar látið af farmennsku og flutti frá Eyjum þegar þau Inga hófu sambúð í Kópavoginum. Sólargeislinn þeirra, Helga Rún, fæddist í árslok 2001.

Við andlát Jóhanns rifjast upp góðar minningar um margar samverustundir. Við áttum mörg samtölin þar sem ýmislegt bar á góma. Gaman fannst okkur að eiga við hann spjall, hann var vel lesinn, fróður og fylgdist vel með því sem gerðist á líðandi stundu. Jóhann var hafsjór af fróðleik um allt er sneri að skipum og bátum, enda átti hann einstakt safn ljósmynda af þeim. Hann hafði gaman af að segja frá veru sinni á sjónum, ekki síst tíma sínum hjá Landhelgisgæslunni. Þær voru ófáar heimsóknirnar sem hann átti þangað eftir að hann kom í land, enda naut hann þess að fylgjast með framgangi starfseminnar þar.

Sambúð Ingu og Jóhanns stóð allt þar til Inga lést árið 2009, langt fyrir aldur fram. Eftir stóð hann einstæður faðir, sem reyndi af fremsta megni að stíga ölduna í lífsins ólgusjó. Hann var stoltur af börnunum sínum, sagði okkur gjarnan frá framgangi þeirra í lífinu og hversu stoltur hann var af þeim. Við hjónin höfum átt því láni að fagna að eiga Helgu Rún sem hluta af lífi okkar og tilveru frá því hún fæddist. Hún hefur á sinn einstaka hátt sýnt og sannað með dugnaði sínum og þrautseigju að henni eru allir vegir færir, þrátt fyrir að aðstæðurnar hafi ekki alltaf verið eins og á best verður kosið. Við fráfall Jóhanns er okkur efst í huga þakklæti fyrir góð kynni, samverustundirnar og einlægnina. Börnunum hans, tengdabörnum og barnabörnum sendum við hlýjar kveðjur með ósk um að minningin um góðan föður sefi sársaukann og söknuðinn. Nú hefur hann haldið í sína hinstu för, við sjáum hann fyrir okkur standa keikan í brúnni þar sem hann siglir fleyi sínu í örugga höfn sumarlandsins.

Kristrún og Ásgeir.

Jói Bjarna talaði hátt. Hann var hávær, sló um sig og hló mikið og brosti, pírði augun í dökkri umgjörðinni. Hann var aðlaðandi maður, brosmildur, svarthærður og dökkur. Við urðum nágrannar sjö ára gamlir, Jói bjó á Heimagötu 30, ég á Grænuhlíð 18, bekkjarfélagar og vinir. Við erum hluti af '56-módelinu sem er samanhnýttur vináttu- og kærleiksvafningur okkar fermingarsystkina. Gosið kramdi ekki bara hús í klessu heldur tætti í sundur æskufélaga og vini svo árum og áratugum skipti. Á þeim tíma lét Jói drauma sína um farmennsku rætast og hann sást ekki lengi. Hann var horfinn á sjóinn, þurfti ekki lengur að standa á trékassa við stýrið, eins og Einar skiptó setti undir hann svo peyinn sæi á kompásinn og út um stýrishúsgluggann á lóðsinum. Jói Bjarna hélt um stýrið um heimsins höf, var á varðskipum og Herjólfi og sigldi stoltur með sitt fólk milli lands og Eyja. Tók á móti okkur við skipshlið og bauð alla velkomna um borð með sitt smitandi og innilega fas, bjartasta stýrimannsbrosið. Það sló birtu á Kleifarnar og skugga á sandinn í Löngu þegar hann stóð á Básaskeri. En lífið var eins og sjórinn, það var ekki alltaf blíða. Hann skall fyrirvaralaust á með suðaustan skít en það var aldrei svo slæmt að hann dytti ekki í dúnalogn, eða bullandi lens með nýju lífi. Þannig steig hann ölduna í lífsins sjó meðan stætt var. Við ræddum lífið á Landspítalanum, ég talaði, hann hlustaði, röddin sterka var brostin og ég þakkaði honum og Guði fyrir vináttu okkar. Hún var gegnheil til síðustu stundar, reist á væntumþykju og virðingu.

Þegar við vorum peyjar var Jói mikið hjá Freymóði bæjarfógeta á Tindastól. Fógetinn talaði mjög hátt og þá gerði Jói það líka. Þegar ég var með að hitta yfirvaldið þá töluðu þeir saman eins og þeir væru í vélarrúmi á fiskibát, mjög hátt en það var engin vél í gangi í íbúð bæjarfógetans. Þeir veittu hvor öðrum gleði og þá láta menn í sér heyra. Jói var fæddur gamall, talaði mál fullorðinna og auðgaði mannlífið. Hann talaði sífellt um báta og skip. Bað mig oft að teikna myndir af bátum og skipum fyrir sig þegar við vorum í barnaskólanum, oftast vildi hann nýja mynd af lóðsinum. Þegar við peyjarnir vorum að safna leikaramyndum safnaði Jói báta- og skipamyndum. Hann var sex ára þegar hann fór að klippa báta- og skipamyndir úr dagblöðum, sem hann safnaði og átti til dauðadags. Hann átti allar bátamyndir frá Westminster, útgefnar 1928-1935. Líka Sólarfilmusafnið, 192 tölusettar myndir. Hann var alæta á fréttir og fréttatengda þætti. Sat yfir slíku efni tímunum saman. Hafði skoðanir og þær heyrðust vel þegar hann rökfastur pírði augun og brosti að vitleysunni sem hann heyrði. Þá var oft látið vaða á súðum, en heilsan bilaði og lífsskipið var bundið við bryggju. Jói Bjarna bað um kastlínuna, hann var komin í friðarhöfn og vildi leggjast utan á lóðsinn. Þar stóð við stýrið peyi á trékassa og bauð hann velkominn heim. Þeir sigldu þöndum seglum með himinskautum þar til slokknaði á siglingasljósunum og Jói Bjarna kastaði akkerinu í síðasta sinn.

Ásmundur Friðriksson.