Reginn fasteignafélag hefur lagt fram tillögu um sölu á 41 fasteign, alls um 90 þúsund fermetrum af atvinnuhúsnæði, úr væntanlegu sameinuðu eignasafni Regins og Eikar. Meginþorri eignanna kemur úr núverandi eignasafni Eikar, eða um 76 þúsund fermetrar.
Tillaga Regins er liður í því að ná sáttum við Samkeppniseftirlitið (SKE) sem hefur haft yfirtökutilboð Regins á Eik til skoðunar. Að stærstum hluta er um að ræða sölu á skrifstofu- og verslunarhúsnæði á ákveðnum samkeppnissvæðum á höfuðborgarsvæðinu og á Akureyri. Lagt er til að eignasalan muni eiga sér stað á tveimur sölutímabilum á ríflega þriggja ára tímabili. Þá hafa Reginn og Kaldalón hafið viðræður um möguleg kaup Kaldalóns á fasteignum sem telja um 47 þúsund fermetra af atvinnuhúsnæði á höfuðborgarsvæðinu.
SKE hefur nú þegar óskað eftir sjónarmiðum hagsmunaaðila vegna þessa.