Það er vor í lofti, – Hafsteinn Reykjalín Jóhannesson yrkir:
Máríerlan marga heillar,
mjúkt um loftið þýtur.
Stéli nettu, stolt hún sveiflar,
strá í hreiður brýtur.
Vor í dal, segir Indriði Aðalsteinsson á Skjaldfönn og heldur áfram: Tókst að böðla dráttarvél yfir skafla og koma inn heyrúllu eftir mánaðar gjöf úr hlöðu. Lóan komin og Halla Hrund á mikilli siglingu til Bessastaða. Virkilega góður og deilingarhæfur dagur:
Nú bjart er jafnt úti sem inni
og öll er tilveran grín.
Það sumrar í sveitinni minni
og sólin á jökulinn skín.
Reinhold Richter er í sólskinsskapi:
Oft er gott að yrkja smá
erindi á vorin
því að nú er næstum frá
nefrennsli og horinn.
Nokkrar feitar flugu hér
flugur inn um gluggann
og segli þöndu fjörðinn fer
fjarska lítil duggan.
Áðan Signý systir mín
sat hér úti á stétt.
Að 'ún mjólki ána sín
ekki þykir frétt
Bjarni Jónsson yrkir við ljósmynd:
Gleðigjafi
Heim kom í hríðaréli
hugrakka litla perlan.
Stöðugt veifaði stéli
á stöplinum maríuerlan.
Jón Atli Játvarðarson skrifar: Fólk sem er í svo viðkvæmri stöðu, að það fyllir varla stuðningsmannalistann en blóðlangar á Bessastaði, heldur að ævintýrið sé rétt að byrja. Ég held að Tjaldur og Spói nái þessu. Sama hvað öllum kjólgopum og kjóabringum líður:
Gengur vel á vistirnar,
vel á stóð með fyrirheit.
Flæmast yfir flatirnar
fuglar tveir í ormaleit.
Enn um forsetakjörið, segir Jón Atli og heldur áfram: Ekki bara metnaður til þjónustu við þjóðina, heldur líka vængjasláttur furðufugla í forsetavalinu sjálfu. „Fólkið velur forsetann,“ eins og Gunnar Thoroddsen sagði í stuðningsyfirlýsingu við tengdaföður sinn, Ásgeir Ásgeirsson:
Framboðið er fráleitt plott,
framinn lagður undir.
Kjóabringa og kvinna flott,
kjaga spóagrundir.