Anton Guðjónsson
anton@mbl.is
Helga Þórisdóttir varð í gær 10. frambjóðandinn í forsetakosningunum sem hefur safnað tilskildum fjölda meðmæla sem þarf til að bjóða sig fram í embættið.
„Með sól í hjarta tilkynni ég hér með að ég hef náð undirskriftunum í meðmælasöfnun fyrir forsetaframboð. Þessu fagna ég á þessum fallega degi, sumardeginum fyrsta, og vil nota tækifærið og óska landsmönnum öllum gleðilegs sumars,“ skrifar Helga í yfirlýsingu.
Það mátti ekki mikið seinna vera hjá Helgu, en framboðsfrestur til embættisins rennur út klukkan 12 á hádegi í dag. Ber frambjóðendum þá að skila listum með meðmælum frá 1.500-3.000 kjósendum.
Landskjörstjórn tekur við framboðum til forseta Íslands á milli klukkan 10 og 12 í dag í Hörpu. Farið verður yfir meðmælalistana um helgina og frambjóðendur látnir vita ef eitthvað þarf að lagfæra.
Þau tíu sem hafa að eigin sögn náð lágmarksfjölda meðmæla eru: Arnar Þór Jónsson, Ásdís Rán Gunnarsdóttir, Ástþór Magnússon, Baldur Þórhallsson, Halla Hrund Logadóttir, Halla Tómasdóttir, Helga Þórisdóttir, Jón Gnarr, Katrín Jakobsdóttir og Steinunn Ólína Þorsteinsdóttir.
Helstu dagsetningar
Í dag rennur út framboðsfrestur. Landskjörstjórn fer þá yfir meðmælalista.
2. maí verða framboð að hafa skilað lagfæringum á meðmælalistum ef þarf. Kosning utan kjörfundar hefst.
31. maí lýkur kosningu utan kjörfundar erlendis.
1. júní verða almennar kosningar til forseta.