Mikilvægt er að þingið viti að á Bessastöðum sitji forseti sem sé reiðubúinn að virkja málskotsréttinn ef þingið af einhverjum orsökum fer fram úr sér, segir Baldur Þórhallsson, prófessor í stjórnmálafræði og frambjóðandi til embættis forseta Íslands.
Baldur er viðmælandi í nýjasta þætti Spursmála á mbl.is. Þar segir hann að forsetinn sé pólitískur. Hann segir það ekki verkefni dómstóla að taka á því ef löggjafinn samþykkir lög sem gangi í berhögg við stjórnarskrána. Forsetanum beri að grípa inn í við slíkar aðstæður. „Mér finnst að bóndinn á Bessastöðum eigi að líta yfir axlirnar á þingheimi þannig að þingheimur telji ekki að það sé bara sjálfkrafa afgreiðsla á lögunum sem lenda til undirskriftar hjá forsetanum.“
Í viðtalinu segist Baldur hafa verið á þeirri skoðun að Ólafur Ragnar hafi verið í fullum rétti í Icesave-málinu og eins fjölmiðlamálinu 2004 þegar hann synjaði lögum staðfestingar. Það gerir hann þrátt fyrir ummæli sem hann lét falla árið 2012 þar sem hann sagði stjórnmálalega óvissu uppi.
Til baka
Leita í greinasafni
Prenta grein