Fyrsti styrkur úr Minningarsjóði Svavars Péturs Eysteinssonar eða Prins Póló var veittur Ægi Sindra Bjarnasyni tónlistarmanni en styrkurinn nemur einni milljón króna. Þetta var tilkynnt á Hammondhátíð á Djúpavogi 26. apríl, á afmælisdegi Prins Póló.
Ægir Sindri sótti um styrk fyrir rekstri á tónleikarýminu R6013 við Ingólfsstræti sem hann hefur rekið í nokkur ár og haldið fjölmarga tónleika. Þar mætast ólíkar stefnur og straumar og gestir fá gullin tækifæri til að hugsa út fyrir rammann og kynnast nýjum tónlistarstefnum og listformi, segir í tilkynningu. Í rökstuðningi stjórnar sjóðsins segir m.a.: „Verkefnið er frumkvöðlastarf sem er keyrt áfram af miklum drifkrafti, hugsjón og skýrri sýn. Það styður við fjölda listamanna og við grasrót tónlistarstarfs ásamt því að gefa tónlistarfólki færi á að koma sér á framfæri.“