Ingólfur Ómar sendi mér góðan póst á sunnudag: „Heill og sæll Halldór, nú er vorið komið og veðrið er aldeilis fallegt hér syðra. – Vormorgunn“:
Morgundísin milda
merlar jökulhjúpinn.
Fjallabrúnir blika
blána himindjúpin.
Silfurbláar bárur
blunda á lygnum græði,
í grænu sefi synda
svanahjón í næði.
Björk og víðir bruma
blóm á engjum gróa.
Við klettinn lindin kliðar
kvakar fugl í móa.
Á Boðnarmiði yrkir Gunnar J. Straumland „Sléttubönd að vori“: „Þegar meint vor var hafið fyrir nokkru rak ég nefið út í óvissuna:
Hopar tíðin, kulda kjól
klæðist dagsins veður.
Dropar falla, sjaldan sól
sálu okkar gleður.
En viti menn! Síðdegis sama dag blésu hlýrri vindar og sólin fór að skína. Til að fagna því las ég vísuna afturábak:
Gleður okkar sálu sól,
sjaldan falla dropar.
Veður dagsins klæðist kjól,
kulda tíðin hopar.“
„Maríuerlan er mætt“ segir Indriði Aðalsteinsson á Skjaldfönn:
Nú finnst mér loksins kuldans réna rugl
frá römmum vetri suðrið loksins raknað.
Á bæjarþekju birtist lítill fugl
sem ber sig vel og ég hef lengi saknað.
Íslensk þjóðvísa:
Kvöldúlfur er kominn hér
kunnugur innan gátta;
sólin rennur, sýnist mér,
senn er mál að hátta.
Gamall húsgangur:
Nú er úti veður vott
verður allt að klessu;
ekki fær hann Grímur gott
að gifta sig í þessu.
Gömul vísa:
Hún er suður í hólunum,
hefur gráa skýlu.
Meira veit ég ekkert um
ættina hennar Grýlu.
Öfugmælavísan:
Geitur hafa góða ull,
í galli er mesta sæta,
í krummanefi er kláragull,
í klónum silfrið mæta.