Eldur kviknaði í dekkjabúnaði á tengivagni vörubíls sem var á ferðinni á Reykjanesbraut, skammt frá IKEA, eftir hádegi í gær. Tilkynning um eldinn barst klukkan rétt rúmlega tvö, að sögn varðstjóra hjá slökkviliðinu á höfuðborgarsvæðinu.
Ökumann vörubílsins sakaði ekki en hann náði að aftengja tengivagninn eftir að eldurinn kviknaði.
Að sögn varðstjórans gekk slökkviliðinu vel að slökkva eldinn en töluverður reykur steig upp á svæðinu um skamma hríð. Engin hætta var á ferð, bætti varðstjórinn við, en umferðartafir urðu töluverðar.
Umferðin gekk hægar en venjulega á Reykjanesbraut vegna eldsvoðans, að því er sagði í tilkynningu frá lögreglunni á höfuðborgarsvæðinu. Af þeim sökum var aðeins önnur akreinin opin til vesturs, að Hafnarfirði, og voru ökumenn vinsamlegast beðnir að sýna tillitssemi vegna þessa.
Einnig urðu tafir á umferð um Miklubraut síðdegis í gær þegar tveggja bíla árekstur varð á brautinni í austurátt, við Réttarholtsveg. Engin slys urðu á fólki.
Til baka
Leita í greinasafni
Prenta grein