Palestínski rithöfundurinn Basim Khandaqji, sem hefur setið í ísraelsku fangelsi í tvo áratugi, hlaut nýverið virt arabísk bókmenntaverðlaun fyrir skáldsögu sína A Mask, the Colour of the Sky. Líbanskur útgefandi hans tók við verðlaununum sem á ensku kallast International Prize for Arabic Fiction á athöfn í Abu Dhabi. Var bók hans valin úr 133 innsendum verkum.
Khandaqji fæddist á Vesturbakkanum, í borginni Nablus, árið 1983. Hann hafði skrifað smásögur þar til hann var handtekinn árið 2004, þá 21 árs. Hann var sakaður um að tengjast sprengjuárás í Tel Aviv og dæmdur í fangelsi þar sem hann hefur setið síðan.
Síðan þá hefur hann haldið áfram að skrifa innan veggja fangelsisins, gefið út nokkrar ljóðabækur og skáldsögur og lokið háskólanámi með aðstoð internetsins.
Til baka
Leita í greinasafni
Prenta grein