Aþena er einum sigri frá því að komast upp í úrvalsdeild kvenna í körfubolta í fyrsta skipti.
Liðið vann nauman 80:78-heimasigur á Tindastóli í þriðja leik liðanna í úrslitaeinvígi um sæti í deild þeirra bestu í Austurbergi í Breiðholti í gærkvöldi.
Er staðan nú 2:1 og fer Aþena upp í úrvalsdeildina með sigri í Skagafirði á þriðjudaginn kemur. Tindastóll freistar þess að knýja fram oddaleik.
Mikið jafnræði var með liðunum allan leikinn og var staðan í hálfleik 42:39, Aþenu í vil. Staðan var svo 78:78 þegar 25 sekúndur voru eftir. Sianni Martin skoraði þá sigurkörfu Aþenu, því Tindastóli tókst ekki að svara í sinni síðustu sókn.
Áðurnefnd Martin, hetja Aþenu, skoraði 26 stig fyrir sitt lið. Dzana Crnac gerði 19.
Ifunanya Okoro var stigahæst hjá Tindastóli með 25 stig. Andriana Kasapi gerði 23.