Halla Hrund Logadóttir segir enga hagsmunaárekstra felast í því að hluti af hennar fremstu stuðningssveit séu einstaklingar sem tengist eða eigi fyrirtæki sem notið hafi greiðslna fyrir veitta þjónustu hjá Orkustofnun á síðustu misserum. Í Spursmálum er hún spurð út í þetta þar sem meðal annars er farið yfir ríflega sjö milljóna greiðslur til fyrirtækisins 99 ehf. Það er fyrirtæki sem sérhæfir sig í markaðsmálum og auglýsingagerð en eigandi þess er Óskar Örn Arnarson sem er í kosningaráði Höllu Hrundar. Samkvæmt úttekt mbl.is nema greiðslur til fyrrnefndra fyrirtækja, sem eiga tengsl við framboð Höllu, að minnsta kosti ríflega 30 milljónum á síðustu 16 mánuðum.
Áður hefur verið fjallað um það í Morgunblaðinu að Karen Kjartansdóttir, einn af eigendum ráðgjafarfyrirtækisins Langbrókar, hefur notið fastra greiðslna fyrir að sinna samskiptamálum Orkustofnunar. Nema greiðslur til hennar frá því í fyrravor tæpum 13 milljónum króna. Karen hélt áfram að sinna þessum störfum eftir að Halla Hrund hóf kosningabaráttu sína en Karen hefur verið virkur þátttakandi við undirbúning og framkvæmd hennar.
Til baka
Leita í greinasafni
Prenta grein