Varptími fuglanna er að ganga í garð og því hefur sumarlokun og ferðabann um friðlandið við Gróttu á Seltjarnarnesi tekið gildi. Það stendur frá 1. maí til 31. júlí.
Á heimasíðu Seltjarnarnesbæjar eru gangandi vegfarendur hvattir til að sýna tillitssemi. Alls er óheimilt að vera með hunda á vestursvæðunum sem og eru kattaeigendur hvattir til að hafa kettina í bandi, nota trúðaól eða halda þeim innandyra fram yfir varptímann. Þessi tilmæli eiga við í varplöndum alls staðar á Íslandi.
Sjóiðkendum er jafnframt bent á að stunda sjóíþróttir norðan og sunnan Seltjarnarness í stað Seltjarnar á varptímanum.
Grótta er landföst, gróskumikil eyja utan við vestanvert Seltjarnarnes og einstök náttúruperla, segir á heimasíðu bæjarins.
Grótta var friðlýst árið 1974 og felst verndargildi friðlandsins þar í fjölskrúðugu fuglalífi árið um kring og mikilvægi þess sem varpsvæðis á sumrin. Þar ber helst að nefna hundruð kríupara sem verpa í og við eyjuna. Fyrstu kríurnar komu á Nesið í þessari viku. Auk kríunnar finnast einnig í eyjunni margar aðrar fuglategundir svo sem æðarfugl, fýll, sendlingur og tjaldur.
Mikið er af lífríkum sjávartjörnum og fjörum við Gróttu og á nærliggjandi svæðum, þar á meðal leirur og sjávarfitjar. sisi@mbl.is
Til baka
Leita í greinasafni
Prenta grein