Norður
♠ KD8
♥ 107642
♦ KD95
♣ D
Vestur
♠ ÁG63
♥ ÁD
♦ 862
♣ ÁG84
Austur
♠ 9754
♥ K85
♦ 4
♣ 76532
Suður
♠ 102
♥ G93
♦ ÁG1073
♣ K109
Suður spilar 3♦.
„Tólf punktar eru tólf punktar,“ hugsuðu keppendur Íslandsmótsins í norður og opnuðu galvaskir á 1♥. Suður sagði 2♥ og vestur doblaði. Þannig hófust sagnir víða í lokaumferð tólf-sveita úrslitanna.
Hvort sem austur sagði 2♠ eða 3♣ hélt suður baráttunni áfram og sagnir enduðu yfirleitt í 3♥, einn til tvo niður. Nema á einu borði. Þar sagði suður 3♦ og var skilinn eftir á þeim stað.
Vestur (Guðmundur Snorrason) kom út með spaða og austur (Sveinn Rúnar Eiríksson) lét níuna undir. Varla frávísun, horfandi á hjónin í borði, þannig að nían hafði á sér nokkurt yfirbragð hliðarkalls. Þegar Guðmundur tók næsta slag á laufás setti Sveinn sjöuna (hæsta spilið) til að ítreka fyrra kall í hjarta! Þá vissi Guðmundur hvað nauðsynlegt var að gera. Hann spilaði hjartaás og drottningu, sem Sveinn yfirdrap og gaf Guðmundi stungu! Einn niður.