„Ekkert sem ég hef orðið áskynja enn sem komið er,“ svarar Berglind Eva Benediktsdóttir, deildarforseti lyfjafræðideildar Háskóla Íslands (HÍ), spurð hvort hún hafi orðið vör við óánægju meðal nemenda í faginu sem munu útskrifast 15. júní og fá að öllum líkindum ekki starfsleyfi fyrr en í byrjun júlí, ólíkt fyrirkomulagi fyrri ára. Andrés Magnússon, framkvæmdastjóri Samtaka verslunar og þjónustu (SVÞ), rakti málið í samtali við Morgunblaðið í gær. Berglind vill árétta að áætlað sé að 25 einstaklingar útskrifist úr framhaldsnámi í lyfjafræði í sumar, ekki 11 líkt og sagði í viðtalinu við Andrés. Síðustu ár hafa brautskráðir nemendur verið færri og hún segir að fjöldi nemenda sé mjög breytilegur á milli ára, frá tíu og upp í 25. Þá vill Berglind árétta að HÍ láti hvorki SVÞ né Landspítalann fá nemendaskrá líkt og kom fram í viðtalinu. Um persónuverndargögn sé að ræða sem HÍ afhendi ekki nema með formlegu leyfi nemenda.
Berglind telur að útskrift verði á þessum tíma næstu ár. „Svo að tímalínurnar breytast svolítið einmitt út af þessu.“ Í febrúar sendi Berglind Lyfjafræðingafélagi Íslands bréf til þess að upplýsa um stöðuna. Kom þar fram að seinkun á veitingu starfsleyfa hefði í för með sér að hagsmunaaðilar apóteka þrýstu kröftuglega á lyfjafræðideild HÍ. Embætti landlæknis sér hins vegar um að veita starfsleyfin. Berglind segir að Heilbrigðisvísindasvið HÍ sé beint og óbeint í viðræðum við landlækni. Hún viti að unnið sé að því að gera kerfið skilvirkara og rafrænt. Berglind hefur þó ekki upplýsingar um hvar sú vinna er stödd í dag. „Það eru allir að reyna að róa í sömu átt.“ Hún segir að lyfjafræðideildin reyni að vinna málin eins hratt og hægt er til þess að útskrifaðir nemendur fái starfsleyfi sín, „en nú er tíminn bara það knappur“.