Hefði vísað Icesave í þjóðaratkvæði

Jón Gnarr, leikari og forsetaframbjóðandi, viðurkennir að hann hafi haft rangt fyrir sér í Icesave-málinu á sínum tíma, en hann kaus með samningunum þegar þeim var vísað til þjóðaratkvæðagreiðslu.

Jón er nýjasti gestur Spursmála og ræðir þar sína sýn á forsetaembættið, meðal annars hvernig hann myndi beita hinum svonefnda málskotsrétti forsetans.

Í máli Jóns kom fram að hann myndi beita réttinum ef stór hluti þjóðarinnar væri andvígur máli sem þingið hefði samþykkt, og nefndi hann m.a. ef viss fjöldi undirskrifta hefði safnast gegn tilteknu máli. Þá myndi hann beita réttinum ef um væri að ræða mál sem hann sjálfur teldi röng, líkt og ef þingið myndi banna fóstureyðingar alfarið eða leiða dauðarefsingu í lög.

Inntur um afstöðu sína til Icesave-málsins sagðist Jón á þeim tíma hafa verið handviss um að það rétta í stöðunni væri að samþykkja samningana sem þá lágu fyrir, en að hann hefði haft rangt fyrir sér þar.

Sagðist Jón geta fullyrt að hann hefði þrátt fyrir það vísað málinu til þjóðarinnar vegna undirskriftasöfnunar InDefence-hópsins.