Norður
♠ ÁK2
♥ D765
♦ 732
♣ 753
Vestur
♠ 74
♥ K1084
♦ K105
♣ D986
Austur
♠ 1086
♥ 2
♦ ÁDG864
♣ G42
Suður
♠ DG943
♥ ÁG93
♦ 9
♣ ÁK10
Suður spilar 4♠.
„Ég hélt ég hefði séð allt.“ Óskar ugla rakst á merkilegt spil í bók eftir Barry Rigal. Austur opnar á 3♦, suður doblar, vestur segir 4♦, norður doblar og suður lýkur sögnum með 4♠. Tígull út upp á ás og hjartatvistur til baka.
„Hver er Barry Rigal?“ spurði Gölturinn, enda ekki eins vel lesinn og fuglarnir.
„Hjartatvisturinn er augljóst einspil,“ hélt Óskar áfram, „og þið takið því á hjartaás og aftrompið vörnina. Rigal er fæddur Englendingur, sem flutti til New York undir lok síðustu aldar og hefur skrifað mikið í bandarísku mótsblöðin. – Alla vega. Trikkið er að nota samganginn í spaða til að hreinsa vestur af tígli með tveimur stungum. Síðan er hjartagosa spilað. Vestur drepur og spilar laufi upp á gosa og kóng. Þá kemur hjartadrottning og meira hjarta og vestur þarf að spila upp í ♣Á10. Tvöfalt innkast.“