Vitringarnir þrír hafa talað

Þeir hafa boðað þjóðinni mikið fagnaðarerindi. Hinum elskaða og dáða forsætisráðherra landsins, í blíðu og stríðu, skal komið í hásæti á Bessastöðum því ella er mikil vá fyrir dyrum.

Ég vona að ég fari rétt með, þótt vissulega hljómi þetta svolítið norðurkóreskt.

Þessir vitringar dáðust mjög að þeirri stjórnkænsku forsætisráðherra (Katrínu) að eftirláta þeim stjórn landsins á hinum alræmda covid-tíma. Með einni stuttri stjórnvaldsyfirlýsingu afsalaði hún sér völdunum: „Hlýðið Víði.“

Þessi vitringur, Víðir, sá m.a. um grímuskylduna og hann tók starf sitt mjög alvarlega. Menn telja sig jafnvel hafa séð hann víða í stórmörkuðum með málband að mæla fjarlægðir á milli manna.

Alls konar uppákomur urðu út af þessum grímum. Má þar nefna verslunarferð eldri hjóna í Bónus. Þegar heim var komið og grímurnar teknar niður uppgötvaði gamli maðurinn að hann hafði tekið ranga konu í misgripum með sér heim. Bæði munu hafa verið farin að tapa nokkurri sjón. Ekki fylgir sögunni hvernig eða hvort sá gamli skilaði hinum óvænta feng til baka.

Þessir vitringar hafa aldrei sýnt að þá skorti stjórnlyndi og þeir leggja kapp á að fyrirskipunin „Hlýðið Víði“ haldi gildi sínu um ókomna tíð og jafnvel út yfir gröf og dauða allra núlifandi.

Eftirtektarvert er að reynslan virðist sýna að þeir fari jafn frjálslega með boðun fagnaðarerinda og boðun válegra tíðinda.

Á tímum covid lá stærsti og æðsti vitringur hinna þriggja ekki á liði sínu að boða þjóðinni mikinn fögnuð í hinni miklu vá. Má þar nefna að þegar fyrstu sendinguna af Astra Zeneca rak á land þá lét hann þau boð út ganga að þar væri mikið og gott „nammi“ á ferð.

Nokkru síðar, er hann var orðinn aðalklappstýra átaks yfirvalda um bólusetningarnar og fannst borgarbúar eitthvað tregir í taumi að mæta í Laugardalshöllina, þá brýndi hann raustina að hætti trúboða og hrópaði yfir lýðnum í beinni útsendingu: „Í guðanna bænum þiggið björgunina!“

Þessi vitringur hafði sett sér metnaðarfullt markmið og reynt að fá Pfizer til að setja Ísland í forgang með afhendingu skammta svo hægt væri að breyta heilli þjóð í eina stóra tilraunamús og komast þar með í heimsmetabók Guinness. Þetta rann þó allt út í sandinn þar sem Pfizer setti Ísrael í þessu efni í forgang.

Þessi stjórnlynda klappstýra átti síðar eftir að missa þolinmæðina við þá óbólusettu með því að væna þá um hreinan „drullusokkshátt“ að láta ekki bólusetja sig. Kannski var það einmitt þarna sem hann virtist einnig hafa misst dómgreindina ef einhver var.

Það dugði ekki til þó að núverandi forseti virtist hafa orðið viðskila við dómgreindina líka er hann lagði þunga sinn á sveif með hvatningarátakinu með allt að beinum hótunum í garð þeirra óbólusettu ef þeir sætu við sinn keip. Hræðsluáróðurinn bar takmarkaðan árangur. Hinir óbólusettu töldu sig vita sínu viti í þessum efnum og reyndust hafa rétt fyrir sér þegar upp var staðið enda gagnsleysi tilraunaefnanna æ betur að koma í ljós. Og sá dagur var ekki langt undan að allar fullyrðingar vitringanna um ágæti þessara efna væru foknar út í veður og vind. Við blasti alger andhverfa. Síendurteknar gagnslausar nálarstungur ollu bara æ meiri skaða á ónæmiskerfi hinna bólusettu.

Nýlega bárust þau válegu tíðindi frá Bretlandi að framleiðandi Astra Zeneca væri hættur framleiðslu á efninu eftir að hafa orðið að viðurkenna fyrir dómstólum skaðsemi þess eins og myndun blóðtappa. Mun gríðarleg umframframleiðsla þess á „namminu“ nú vera á leiðinni í gegnum breska skólpkerfið út í hafsauga. Margar þjóðir, eins og Danir, bönnuðu snemma í ferlinu notkun þess.

Þrátt fyrir að ljóst væri að heilbrigðum börnum stæði engin hætta af veirunni hvöttu vitringarnir til þess að börn allt niður í fimm ára yrðu bólusett. Ráðherrar létu gott heita og engar viðvaranir bárust frá Bessastöðum.

Repúblikanaflokkurinn í tveimur ríkjum Bandaríkjanna, Arizona og 10 svæðadeildir hans í Flórída, hefur nýverið gert samþykkt þess efnis að Pfizer mRNA-bóluefnið skuli tafarlaust bannað. Augljósar staðreyndir hrannast nú upp um víða veröld um skaðsemi þessara tilraunaefna.

Það skyldi þó aldrei vera að vitringarnir þrír séu farnir að óttast málaferli í náinni framtíð vegna afglapa í starfi? Og þess vegna ríði á að koma auðsveipum og hugsanlega samsekum forseta á Bessastaði með handbremsu á málskotsréttinum.

Sem betur fer hafa landsmenn það í hendi sér að velja annan frambjóðanda sem forseta en þann sem hinir misvitru vitringar styðja og hefur orðið þjóðinni dýr. En hver og einn ætti að gaumgæfa að atkvæðið fari ekki í súginn. Í þ.s.b. þyrfti margur kjósandinn að sætta sig við að velja ekki endilega þann sem honum líst best á nema hann telji að sá frambjóðandi sé sigurstranglegur.

WHO hefur nýlega þrýst á ríkisstjórn Íslands að samþykkja í raun alræðisvald til stofnunarinnar. Allt bendir til að ríkisstjórnin muni samþykkja þá Frankenstein-hrollvekju sem fælist í slíku fullveldisframsali. Vonandi dregst það á langinn þannig að nýr forseti með bein í nefinu geti vísað málinu til þjóðarinnar.