Halla Tómasdóttir er minn forseti

Halla er kona sem hefur gengið í gegnum erfiðleika í lífi sínu og skilur því hvernig það er fyrir unga stúlku að vera svipt frelsi sínu og sakleysi, að eiga við viðkvæmar tilfinningar og úrvinnslu á þeim og fyrir vikið er hún kærleiksrík og auðmjúk gagnvart lífinu og heiminum í heild.

Halla er konan sem stígur inn í ótta sinn ef hún þarf á því að halda og tekur skrefin ef hún telur þau til gæfu fyrir heiminn allan en viðurkennir á sama tíma óttann sem hún fyllist, sem fyrir mér er góður kostur og mikill styrkleiki.

Halla er vel menntuð, dugleg, víðsýn, reynd og vel tengd erlendis og hérlendis sem er nauðsynlegt á tímum þeim sem við lifum.

Halla viðurkennir mistök sín og rangar ákvarðanir og lærir af þeim í stað þess að fela mistökin og lifa í skugga þeirra og það kalla ég heiðarleika.

Það tapaði enginn peningunum sínum hjá bankanum hennar, Auði Capital, í hruninu vegna þess að hún og þær sem bankanum stýrðu eru klárar í viðskiptum og höfðu hagsmuni viðskiptavina bankans að leiðarljósi.

Halla var með mér á þjóðfundinum þar sem ég var lóðs og hún var ein af þeim sem komu honum á laggirnar vegna þess að henni er umhugað um að vilji og gildi fólksins fái rými í stjórnarskrá Íslands.

Halla vill innleiða þau gildi sem þjóðin kaus en þau eru jafnrétti, virðing, réttlæti, mannréttindi, ábyrgð, heiðarleiki og lýðræði svo nokkur séu nefnd.

Halla er kona þessara góðu gilda sem vafalaust mun reyna á í embætti forseta Íslands og ég hef þá trú að mannlegheit og skynsemi ásamt hugsun um velferð komandi kynslóða muni ávallt vera hennar leiðarljós í ákvarðanatökum.

Halla er ekki pólitísk en vinnur ötullega að því að koma á betra siðferði í viðskiptum um allan heim og innleiða mennskuna þar, ásamt því að vilja standa vörð um betra mannlíf þar sem allir hafa atkvæði og önnur hugsun en arðsemi fyrirtækja verði höfð að leiðarljósi.

Börn Höllu og Bjössa hafa ekki farið varhluta af metnaði þeirra í því að bæta heiminn og eru menningarlæsi og tungumálakunnátta sett í forgang þegar kemur að lífsmenntun þeirra. Það tel ég mikla skynsemi þar sem alþjóðleg góð tengsl byggjast á þekkingu á menningu og trú hvers lands fyrir sig og virðingu fyrir mismun þeirra.

Halla er afar vel máli farin og málefnaleg í alla staði og mun verða okkur til mikils sóma hvar sem hún stígur niður fæti og að auki er hún stórglæsileg.

Halla er hógvær og hjartahlý manneskja sem ég treysti 100% fyrir velferð barnabarna minna og þeirra sem mér eru kærastir og því veiti ég henni atkvæði mitt í komandi forsetakosningum.