Tvær sýningaropnanir verða í Listvali í dag, laugardag. Þá verða opnaðar sýningarnar Flauelstjald með verkum eftir Helgu Páleyju og Púls með verkum eftir Hólmfríði Sunnu Guðmundsdóttur.
Teikningin hefur verið leiðandi í verkum Helgu Páleyjar frá upphafi og er hún í tilkynningu sögð kanna mörk miðilsins með því að yfirfæra teikninguna á striga og aðra miðla. „Á sýningunni Flauelstjald má sjá verk á pappír og striga þar sem teikningin er, eins og áður, undirstaða verkanna. Tjaldið sem er leiðandi myndefni í verkunum er táknmynd hugmyndar eða fyrirbæris sem mann langar að kanna meira.“
Á sýningunni Púls tekst Hólmfríður Sunna á við „síkvikt eðli og óróleika náttúrunnar, þar sem allt springur út og að lokum dofnar. Ryþmískar og léttar pensilstrokur endurspegla reglubundið flæði og púls sköpunarverksins. Rík efniskennd og áferð eru áberandi en þau gefa óljósa tilfinningu hvort um sé að ræða hold, landslag, örheim eða kynjaverur,“ segir m.a. í tilkynningunni.
Til baka
Leita í greinasafni
Prenta grein