Hrafnhildur Björk Jóhannsdóttir fæddist 27. apríl 1947. Hún lést 23. maí 2024.

Hún var dóttir Guðrúnar Sigurðardóttur f. 24. desember 1905, d. 29. desember 1996, og Jóhanns Eyþórssonar, f. 17. febrúar 1921, d. 2. september 2005. Systkini hennar eru níu, Guðbjörg Pálsdóttir f. 12 desember 1929, d. 18 júní 1958, Sigurbjörg Pálsdóttir f. 26 mars 1932, Pálína Kristín Pálsdóttir f. 23. janúar 1935, Hólmfríður Svala Jóhannsdóttir f. 16 ágúst 1943, Páll Eyþór Jóhannsson f. 1 desember 1950, Einar Jörundur Jóhannsson f. 1 mars 1953, Heiðar Ingi Jóhannsson f. 31 janúar 1955, Sveinn Sævar Jóhannsson f. 27. febrúar 1957, d. 9. júní 1967, og Ólafur Unnar Jóhannsson f. 18. október 1959.

Hrafnhildur giftist Valgeiri Rafni Halldórssyni rafvirkja og saman áttu þau eina dóttur, Völu Björk f. 19. apríl 1977. Þau skilja svo 1982. Hrafnhildur hefur svo sambúð með Erlingi Gunnarssyni f. 25. janúar 1950 sem var bóndi í Gautavík frá 1972 til 2006. Fluttu þau saman til Hveragerðis 2006 þar sem þau settust að og bjó hún þar til dauðadags.

Hrafnhildur vann lengi vel í tískubúðinni Stórar stelpur, en skipti svo um vettvang og fór að vinna á vistheimili fyrir fullorðið fólk, sem var hennar köllun.

Eftir að hún flutti til Hveragerðis og hætti að vinna hellti hún sér út í sjálfboðavinnu með Rauða krossinum, stofnaði sönghóp eldri borgara og var mjög virk í félagslífi eldri borgara í Hveragerði.

Hrafnhildur lést á Borgarspítalanum eftir stutt og erfið veikindi vegna blóðsýkingar.

Útförin fer fram í Hveragerðiskirkju í dag, 29. maí 2024, klukkan 14.

Um himinsælu dátt þig dreymi,

Drottins miskunn verndi sál.

Blasir við þér birta og friður

bak við heimsins þraut og tál.

Endar samleið, klukkan kallar,

kveðju hinzta fram ég ber.

Vinir fagna fyrir handan,

friður Drottins sé með þér!

(Gísli Ólafsson)

Kveðja, þínar systur,

Pálína Kristín Pálsdóttir og Sigurbjörg Pálsdóttir.