Hafrannsóknastofnun stendur við fyrri ráðgjöf sína um veiðar á langreyði og leggur til við matvælaráðherra að veitt verði 161 dýr í sumar. Þetta staðfestir Þorsteinn Sigurðsson forstjóri Hafrannsóknastofnunar í samtali við Morgunblaðið.
Matvælaráðuneytið óskaði í gær eftir umsögnum þriggja stofnana, Hafrannsóknastofnunar, Fiskistofu og Matvælastofnunar, um umsókn Hvals hf. um leyfi til veiða á langreyðum og skilaði stofnunin umsögn sinni í gær til matvælaráðuneytisins. Auk fyrrgreindra stofnana var óskað umsagna frá 13 hagaðilum.
„Okkar hlutverk er ráðlegging um sjálfbæra nýtingu auðlindarinnar og hefur sú ráðgjöf legið fyrir frá árinu 2017,“ segir Þorsteinn og vísar þar til nýtingarráðgjafar stofnunarinnar sem tekur til áranna 2018 til 2025. Þar segir að ráðlagt sé að árleg veiði á langreyði á fyrrgreindu tímabili verði ekki meiri en 161 dýr. Kemur þar fram að langreyði hafi fjölgað jafnt og þétt við Ísland frá upphafi hvalatalninga árið 1987 og hafi fjöldi dýra árið 2015 verið sé mesti frá því talningar hófust, en ráðgjöfin byggist á þeirri talningu.
„Það sem snýr að okkur lögum samkvæmt er sjálfbær nýting dýrastofna og ef útgefin leyfi til hvalveiða verði innan þeirra marka sem ráðgjöf okkar veitir, þá gerum við ekki athugasemdir við aðra þætti málsins. Það hefur ekkert breyst í okkar gögnum,“ segir Þorsteinn.
Hann bætti því við að farið yrði í hvalatalningar í sumar ásamt fleiri þjóðum. Ný ráðgjöf kæmi ekki fyrr en seint á næsta ári.
oej@mbl.is
Til baka
Leita í greinasafni
Prenta grein