Verum óhrædd

Í kosningabaráttunni undanfarnar vikur hefur það vakið athygli að einn tiltölulega lítt þekktur frambjóðandi skipaði sér fljótt í raðir þeirra efstu samkvæmt skoðanakönnunum. Þetta er Halla Hrund Logadóttir. Hún hefur greinilega náð vel til almennings með ljúfmannlegri framkomu og glaðlegu viðmóti, látleysi en um leið virðuleika. Þetta kom þeim sem þekkt hafa hana lengi, starfað með henni og fylgst með verkum hennar ekki neitt á óvart. Hins vegar virtist sem það kæmi ýmsum öðrum óþægilega á óvart.

Skoðanakannanir sýna jafnframt að stuðningur við Höllu Hrund kemur úr breiðum hópi fólks í samfélaginu um land allt. Hún þekkir vel landið sitt og þjóðina og mun hlúa vel að þeim gildum sem menning okkar byggist á. Halla Hrund, ung kona í blóma lífsins, býr yfir dýrmætri reynslu, menntun og þekkingu sem hún hefur aflað sér heima og erlendis. Hún hefur sýnt að hún er óhrædd við að ráðast í ný verkefni og hefur dugnað og úthald til að fylgja þeim eftir. Höllu Hrund fylgir ferskur andblær og nýr tónn, fyrirheit um nýja tíma. Hún mun verða glæsilegur fulltrúi nýrrar kynslóðar í hlutverki þjóðhöfðingja bæði innan lands sem á erlendum vettvangi.

Margir kjósendur hafa ekki enn gert upp hug sinn og stuðningsmenn hennar geta með samstilltu átaki náð til enn fleiri. Tökum því höndum saman á lokasprettinum og verum óhrædd við að fylgja sannfæringu okkar. Tryggjum Höllu Hrund Logadóttur góða kosningu í embætti forseta Íslands á laugardaginn kemur.