Tveir prestar hafa nýlega verið ráðnir til starfa við kirkjur á höfuðborgarsvæðinu. Frá þessu er skýrt á vefnum kirkjan.is.
Séra Guðlaug Helga Guðlaugsdóttir hefur verið ráðin prestur í Lágafellssókn í Mosfellsprestakalli. Guðlaug Helga ólst upp á Hvolsvelli. Hún er dóttir hjónana Guðrúnar Árnadóttur og Guðlaugs Friðþjófssonar.
Hún er gift Einari Þór Hafberg, sérfræðingi í lifrarsjúkdómum og lifrarígræðslulækningum barna, og eiga þau tvær dætur, Brynhildi Guðrúnu, 14 ára, og Ísafold Örnu, 12 ára.
Guðlaug Helga útskrifaðist frá guðfræði- og trúarbragðafræðideild Háskóla Íslands með cand.theol.-próf árið 2009. Eftir nám starfaði hún um tíma hjá Félagsþjónustu Snæfellsbæjar.
Fjölskyldan bjó erlendis í 11 ár en eftir heimkomuna byrjaði Guðlaug Helga að vinna á leikskólanum Langholti en hóf svo störf hjá Lágafellssókn. Meðfram því var hún hópstjóri hjá Sorgarmiðstöðinni.
Þá hefur séra Steinunn Anna Baldvinsdóttir verið ráðin prestur við Seljasókn í Reykjavíkurprófastsdæmi eystra. Steinunn Anna er fædd og uppalin í Seljahverfi. Hún er dóttir hjónanna Baldvins Bjarnasonar og Kristínar Jónu Grétarsdóttur.
Steinunn Anna er einstæð tveggja barna móðir og býr með börnum sínum, níu ára og eins árs, í Seljahverfi.
Árið 2015 lauk sr. Steinunn Anna BA-gráðu með guðfræði sem aðalgrein og tómstunda- og félagsmálafræði sem aukagrein.
Hún lauk BA-gráðu í guðfræði árið 2021 og mag. theol.-gráðu í guðfræði árið 2024.
Steinunn Anna hefur frá árinu 2014 starfað sem kirkjuvörður og æskulýðsfulltrúi í Seljakirkju.
sisi@mbl.is
Til baka
Leita í greinasafni
Prenta grein