Kóvid-bóluefnin krabbameinsvaldandi

Japanskir vísindamenn hafa staðfest tengsl á milli bólusetninga og sex tegunda krabbameins í stærstu rannsókn til þessa á skaða af völdum kóvid-mRNA-bóluefnanna. Gagnagrunnur með öllum 123 milljónum Japana lá undir í rannsókninni en Japanir eru ein bólusettasta þjóð heimsins. Krabbameinin eru í eggjastokkum, munnholi (vörum, munnholi og barka), blöðruhálskirtli, brisi og brjóstum auk hvítblæðis. Þessar tegundir krabbameins eru allar þekktar sem estrógenviðtaka alfa (ERa)-næm krabbamein. [1, 2, 3]

Í ritrýndri rannsókninni sem birtist í apríl var aldursleiðrétt dánartíðni af völdum 20 mismunandi tegunda krabbameins í Japan könnuð með því að nota opinberar tölur um dauðsföll, smit af völdum SARS-CoV-2 og bólusetningartíðni. Niðurstöður rannsóknarinnar, sem markar tímamót, sýna að dauðsföllum af völdum krabbameins fjölgaði ekki í Japan fyrr en með tilkomu fjöldabólusetninganna. Rannsóknin tekur af allan vafa um að umframdauðsföllin í Japan megi rekja beint til skaða af völdum bóluefnanna en ekki til veirunnar.

Áður höfðu komið út nokkur hundruð vísindagreinar sem sýna okkur hvernig efnin skaða ónæmiskerfið á margvíslegan hátt, sem gerir fólk útsettara fyrir krabbameinum, en á sl. ári hafa komið út, skv. vitneskju höfunda, a.m.k. vel á þriðja tug ritrýndra vísindagreina sem einblína á hversu krabbameinsvaldandi þau eru.

Íslendingum ættu ekki að koma niðurstöður vísindamannanna á óvart því hérlendis staðfesti embætti landlæknis hliðstæðar niðurstöður og Japanir hafa nú fundið með útgáfu dánarmeinaskrár fyrir árið 2022. Dauðsföllum af völdum illkynja æxla á Íslandi fjölgaði um 9% á árinu 2022. Illkynja æxli í blöðruhálskirtli dró 21% fleiri til dauða en á fyrra ári, eitilæxli 17%, mergæxli 40%, æxli í brisi 23% og dauðsföllum af völdum hvítblæðis fjölgaði um 33% frá fyrra ári.

Þrátt fyrir ritrýndar og vandaðar japanskar rannsóknarniðurstöður sem sýna fram á alvarlegar aukaverkanir og krabbameinsvaldandi áhrif kóvid-mRNA-efnanna og þrátt fyrir upplýsingar úr dánarmeinaskrá landlæknis um dauðsföll af völdum krabbameins á árinu 2022 finnast enn á Íslandi læknar sem átta sig ekki á skaðsemi kóvid-tilraunabóluefnanna. Umframdauðsföllin á liðnum mánuðum og misserum sem rekja má til efnanna og skipa Íslandi í hóp þeirra þjóða þar sem hlutfallslega flestir hafa látist virðast ekki hafa áhrif á viðhorf læknanna, sem halda áfram að lofa efnin þrátt fyrir gífurlegan fjölda birtra rannsókna sem sýna fram á skaðsemi þeirra og gagnsleysi sem sýkinga- og smitvarnar.

Landsmönnum virðist skaðinn af völdum efnanna ljós sem endurspeglast í dræmri þátttöku í bólusetningarherferð vetrarins gegn kóvid. Fáum blandast lengur hugur um skaðann sem kóvid-mRNA-tilraunabóluefnin valda á ónæmiskerfi líkamans.

Þegar helstu sérfræðingar heimsins á sviði krabbameinslækninga tjá sig um hætturnar sem fylgja kóvid-mRNA-efnunum er ástæða til að leggja við hlustirnar. Einna þekktastur þeirra er prófessor Angus Dalgleish, sem nýtur heimsfrægðar fyrir að hafa uppgötvað hvernig HIV-veiran kemst inn í frumur líkamans og veldur eyðni (AIDS). Uppgötvun Dalgleish olli vatnaskilum í baráttunni við eyðni þar sem hún varðaði veginn til meðferðar sem gaf einstaklingum sem berjast við þennan illvíga sjúkdóm raunhæfan möguleika á að takast á við hann.

Ásamt prófessor Dalgleish hafa fjölmargir háttskrifaðir krabbameinssérfræðingar eins og t.d. prófessorarnir Fukushima frá Japan og prófessor Gabriel Oon frá Singapúr lýst viðhorfum sínum til kóvid-mRNA-bóluefnanna sem þeir telja að hætta beri notkun á meðan öryggi og virkni þeirra er könnuð. Þessir sérfræðingar eiga það sameiginlegt að vera við það að ljúka starfsferli sínum og þurfa því ekki að óttast um störf sín leyfi þeir sér að gagnrýna bóluefnin. Íslenskir læknar treysta sér ekki starfsöryggis vegna til að tjá efasemdir sínar í garð bóluefnanna. Gerðu þeir það væru þeir að setja afkomu sína og fjölskyldna í hættu.

Að umgjörð heilbrigðismála skuli hafa þróast með þeim hætti að læknar treysta sér ekki af ástæðum starfsöryggis til að fjalla um orsakir sjúkdóma og er meinað að ávísa lyfjum sem landlækni og lyfjaframleiðendum eru ekki þóknanleg er landsmönnum óboðlegt.

Heimildir:

1. Increased Age-Adjusted Cancer Mortality After the Third mRNA-Lipid Nanoparticle Vaccine Dose During the COVID-19 Pandemic in Japan – https://bit.ly/japankrabbi-1

2. Study Finds ‘Significant Increase’ in Cancer Mortality After Mass Vaccination With 3rd COVID Dose – https://bit.ly/japankrabbi-2

3. Excess Deaths In Japan Hit 115,000 Following 3rd COVID Shot; New Study Explains Why – https://bit.ly/japankrabbi-3