Guðni Th. Jóhannesson forseti Íslands telur að Halla Tómasdóttir verði góður forseti. Þetta kemur fram í bréfi Guðna til Höllu sem birtist á heimasíðu forsetaembættisins.
„Ég óska þér innilega til hamingju með kjörið. Þú verður góður forseti. Ég færi einnig Birni, börnunum og fjölskyldunni allri heillaóskir. Þar nefni ég líka sérstaklega móður þína sem var svo virðuleg og hlý í viðtölum. Hún má svo sannarlega vera stolt af dóttur sinni,“ skrifar Guðni.
Þá segir Guðni að gott sé að búa á Bessastöðum. Hann vonar að Höllu og eiginmanni hennar muni líða vel þar.
„Þú tekur við embætti sem Íslendingum þykir afar vænt um. Þjóðin kaus sín ólíku forsetaefni eins og vera ber en mun núna sameinast um að styðja þig og styrkja til góðra verka. Það sýna fyrri fordæmi og við Eliza verðum alltaf boðin og búin að veita ykkur stuðning á vandasömum vettvangi. Við hjónin vonum sömuleiðis að ykkur muni líða vel hér á Bessastöðum. Hér er gott að búa,“ skrifar Guðni.
Til baka
Leita í greinasafni
Prenta grein