Magnús Halldórsson yrkir á Boðnarmiði:
Ég orti þessa' í einum rykk,
sem ýmsir munu telja klikk.
Húní írsk ei telst,
þótt allra helst
líkindin séu með Limerick.
Helgi Ingólfsson hafði orð á því á fimmtudag að hann heyrði skemmtilegt nýtt orð í gær:
Þau búa í bergmálshelli
og báglega umbera skelli.
Þau véla um valdið
sem vel skal á haldið,
en óttast mest elítuhrelli.
Limrurnar Í Hvalasafni eftir Sturlu Friðriksson:
Við hittumst hér vinir að vanda
og virðum til beggja handa
í fallegum sölum
fjöldann af hvölum
á Fiskislóð úti á Granda.
Við hittumst í sýningarsölum,
og saman um gripina tölum
þar sem ég og var
á safninu þar
alveg að kafna úr kvölum.
Í Sjöundu Davíðsbók segir frá því ráðamenn hugleiddu veturinn 2019 að þar sem barnafjölskyldur væru nær allar fluttar úr Grímsey væri ráð að fá þangað eldra fólk:
Breytt Grímsey vill gömlum hið besta,
þar góðvild mun ríkja og festa
og augljós er þörfin
fyrir öll nýju störfin
en einkum þó grafara og presta.
Í Davíðsbók segir einnig frá því, að þegar læknaverkfallinu lauk létti mjög þeim sjúklingum sem biðu eftir aðgerð:
„Þvílíkur léttir að lenda ekki í því
að liggja hér sjálfdauð og rotin,“
sagði hölt rolla er datt oní dý
er dregin var upp úr – og skotin.
Tómas Guðmundsson kvað:
Hamingjufjandi húmið er
ef hleypt er geyst á skeið
því hált er stundum í Bakarabrekku
og brött er siðferðisleið.
Karl Sigtryggsson á Húsavík var spurður að því hvort hann vildi láta grafa sig eða brenna þegar jarðvist hans væri lokið. Hann svaraði:
Minni sterku moldarþrá
mundi bálið ama
en þeim sem vísan eldinn á
ætti að standa á sama.
Öfugmælavísan:
Skatan á að skrýða prest,
skrifað er það í bókum,
krummi oft í kórnum sést,
kálfur á við stýrið best.