KA hefur ákveðið að áfrýja niðurstöðu Héraðsdóms Norðurlands eystra til Landsréttar í máli Arnars Grétarssonar gegn félaginu vegna bónusgreiðslna sem hann telur sig eiga inni.
Knattspyrnudeild KA var dæmd til að greiða Arnari tæpar 8,8 milljónir króna auk dráttarvaxta, frá 5. nóvember 2023 til greiðsludags, eða einum mánuði frá því að Arnar krafði KA um bónusgreiðslu samkvæmt niðurlagsákvæði í samningi hans við félagið.
Héraðsdómur Norðurlands eystra komst að þeirri niðurstöðu að KA bæri að greiða Arnari sem nemur 55 þúsund evrum eða 10% af árangurstengdum greiðslum KA frá UEFA, Knattspyrnusambandi Evrópu, vegna þátttöku félagsins í Sambandsdeild Evrópu árið 2023, á gengi sem nam 144,90 krónum á hverja evru, 29. september 2023.
Í yfirlýsingu frá KA kemur fram að félagið fellir sig ekki við þá túlkun sem dómurinn er byggður á. Þá telur félagið mikilvægt að fá úr því skorið, ekki bara fyrir sig heldur einnig önnur íþróttafélög og atvinnulífið almennt.
KA byggir áfrýjun sína á því að Arnar var ekki lengur við störf hjá félaginu þegar liðið lék í Sambandsdeildinni.
„Bent er á að Arnar Grétarsson ákvað einhliða að semja við annað lið áður en samningur hans við KA rann út en á þeim tímapunkti var KA ekki búið að tryggja sæti sitt í Evrópukeppni. Að mati KA geta starfsmenn ekki átt heimtingu á greiðslum eftir að ráðningarsambandi lýkur,“ segir m.a. í yfirlýsingunni.