Handknattleiksmarkvörðurinn Einar Baldvin Baldvinsson er genginn til liðs við Aftureldingu en hann kemur frá Gróttu. Einar Baldvin hefur spilað með Gróttu við góðan orðstír undanfarin ár. Afturelding komst í úrslitaeinvígi Íslandsmótsins í vor og stefnir einu skrefi lengra á næsta tímabili.
Guðrún Arnardóttir, landsliðskona í knattspyrnu, var í gær útnefnd besti leikmaður maímánaðar í sænsku úrvalsdeildinni. Guðrún er í lykihlutverki í varnarleik Rosengård sem hefur unnið alla átta leiki sína á tímabilinu og aðeins fengið á sig tvö mörk.
Tillaga Wolverhampton Wanderers um að hætta notkun myndbandsdómgæslu, VAR, við dómgæslu leikja í ensku úrvalsdeildinni í knattspyrnu var felld með miklum meirihluta á ársfundi deildarinnar í gær. Hin 19 félögin kusu gegn því að hætta myndbandsdómgæslu.
Harry Maguire, James Maddison, Curtis Jones og Jack Grealish eru meðal þeirra sem ekki komust í endanlegan 26 manna hóp Englands fyrir EM í knattspyrnu en Gareth Southgate tilkynnti hópinn í gær.
Tindastóll mun taka sæti Fjölnis í úrvalsdeild kvenna í körfubolta á næsta tímabili. Fjölnir dró lið sitt úr keppni í síðustu viku og var því eitt laust sæti í deildinni. KKÍ bauð Tindastóli sætið og staðfesti félagið í gær að það hefði tekið boðinu. Tindastóll mun því leika í efstu deild í fyrsta sinn síðan árið 2000.
Danski körfuknattleiksmaðurinn Daniel Mortensen hefur skrifað undir nýjan tveggja ára samning við Grindavík. Hann kom til Grindavíkur frá Haukum síðasta sumar og var lykilmaður í liði sem fór alla leið í oddaleik úrslita Íslandsmótsins. Mortensen lék fyrst hérlendis með Þór Þorlákshöfn og varð Íslandsmeistari árið 2021.
Úrúgvæinn Darwin Núnez skoraði þrennu í vináttulandsleik Úrúgvæ og Mexíkó í Denver í fyrrinótt. Úrúgvæ vann leikinn 4:0 en Núnez skoraði tvisvar í fyrri hálfleik og fullkomnaði þrennuna í þeim seinni. Núnez átti erfitt uppdráttar með Liverpool undir lok síðasta tímabils en það virðist ekki hafa áhrif á kappann með landsliðinu.
Framherjinn Erling Haaland nálgast markamet norska landsliðsins í knattspyrnu karla óðfluga. Haaland skoraði öll þrjú mörk Noregs í sigri á Kósóvó í fyrrakvöld, 3:0, og hefur skorað 30 mörk í 32 landsleikjum en metið er níutíu ára gamalt. Jörgen Juve skoraði 33 mörk fyrir Noreg í 30 leikjum á árunum 1929-1934 og hefur haldið markametinu síðan.