Miðað við þróun eldgossins á Sundhnúkagígaröðinni má gera ráð fyrir að eldsumbrotunum ljúki seint í sumar, segir Þorvaldur Þórðarson eldfjallafræðingur í samtali við Morgunblaðið.
Gosvirkni heldur áfram í einum gíg við Sundhnúkagígaröðina. Í fyrradag jókst hraunstreymi norðan við Sýlingarfell með þeim afleiðingum að Grindavíkurvegur fór undir hraun í þriðja skiptið.
Þorvaldur telur líklegt að orsök aukins hraunflæðis frá eldgosinu í fyrradag sé sú að lokast hafi fyrir hraunstreymi úr gígnum að sunnanverðu.
Þorvaldur telur að varnargarðarnir muni verja Bláa lónið og metur Svartsengisvirkjun ekki í meiri hættu nú en áður. Hann segir erfiðleikana aukast því lengur sem atburðarásin stendur yfir og takmarkanir séu fyrir því hve háa varnargarða hægt sé að byggja. vally@mbl.is