Höskuldur Daði Magnússon
hdm@mbl.is
Sveitarstjórn Rangárþings ytra hefur hafnað beiðni frá hreppsnefnd Ásahrepps um að hefja formlegar viðræður um sameiningu sveitarfélaganna. Ásahreppur sendi nýverið erindi til bæði Rangárþings ytra og Rangárþings eystra þessa efnis.
Á fundi sveitarstjórnar Rangárþings ytra í gær samþykktu fimm fulltrúar af sjö að hafna erindi Ásahrepps. Í bókun Á-listans sem er í meirihluta er rifjað upp að íbúar Ásahrepps hafi hafnað sameiningu fimm sveitarfélaga á Suðurlandi með miklum meirihluta árið 2021. Skoðanakönnun sem gerð var í Ásahreppi samhliða nýafstöðnum forsetakosningum sýni að 56% þeirra sem tóku afstöðu séu ekki hlynnt sameiningu. Það sé að mati sveitarstjórnarfulltrúanna ekki gott veganesti inn í sameiningarviðræður auk þess sem Rangárþing ytra standi vel og því sé ekkert sem þrýsti á að hefja slíkar viðræður yfirhöfuð. Tveir fulltrúar Sjálfstæðisflokksins gátu þess í bókun að eðlilegra hefði verið ef íbúum hefði verið gefinn kostur á að kjósa um þennan sameiningarkost.
Ekki náðist í Anton Kára Halldórsson, sveitarstjóra Rangárþings eystra, í gær en sveitarstjórnin þar hefur ekki tekið umrædda beiðni fyrir. Búast má við að það verði gert á fundi hennar í dag.