Fjármál Reykjavíkurborgar eru sífellt fréttaefni, en Örn Arnarson fjölmiðlarýnir Viðskiptablaðsins finnur að því að margir fjölmiðlungar virðist telja mat á fjárhagsstöðu sveitarfélaga huglægt fremur en að tölur og staðreyndir fái að tala sínu máli.
Fáir hafi minnst á að 15 ma.kr. lán Þróunarbanka Evrópuráðsins til Reykjavíkurborgar sé rekstrarlán, sem endurspegli alvarlega fjárhagsstöðu hennar. Bankinn telji að vísu að það eigi að renna til félagslegrar aðlögunar skólastarfs í viðkvæmu samfélagi, en Einar Þorsteinsson borgarstjóri segi innfæddum að það fari í viðhald vegna myglu.
Útsvar ætti undir eðlilegum kringumstæðum að standa undir viðhaldi, en lántaka í evrum með tilheyrandi gjaldeyrisáhættu tæplega fyrsti kostur. Borgin eigi hins vegar erfitt með fjármögnun á innlendum skuldabréfamarkaði, bankarnir geti ekki lánað henni meira vegna áhættustýringar, en yfirdrátturinn kominn í 14 ma.kr.; álíka mikið og þróunarlánið.
Örn segir engan vafa lengur um grafalvarlega fjárhagsstöðu Reykjavíkur: „Tilkynning borgarinnar um að Perlan, ónýtt asbesthús í Elliðaárdal og nokkur bílastæði niðrí bæ séu nú til sölu, [ætti] að eyða honum endanlega. Það fé sem borgin kemur til með að fá fyrir þessar eignir mun rétt eins og lánið frá Þróunarbankanum renna í þá hít sem rekstur borgarinnar er orðinn.“
Til baka
Leita í greinasafni
Prenta grein