Reisa íþróttamiðstöð í Búðardal

Framkvæmdir við byggingu íþróttamiðstöðvar í Búðardal hófust í síðustu viku þegar efnilegir íþróttakrakkar af svæðinu tóku fyrstu skóflustungurnar að mannvirkinu. Þetta var gert 11. júní, þann dag þegar Dalabyggð í núverandi mynd varð til með sameiningu nokkurra sveitarfélaga.
Í Dalabyggð hefur lengi verið þörf á að bæta íþróttaaðstöðu og nú er skrefið tekið. Miðstöðin samanstandi af íþróttasal, þjónustukjarna með búningsklefum og lyftingasal ásamt útisundlaug. Undir þaki þarna eru 1.335 m². Svo bætist við útisvæði sundlaugar sem eru 670 m². Samið hefur verið við byggingafyrirtækið Eykt um framkvæmdir að öllu leyti og gerður hefur verið samningur þar að lútandi. Sá er upp á rúmlega 1,2 ma. kr. Þá hefur vegna þessa verið slegið lán hjá Lánasjóði sveitarfélaga upp á 950 millj. kr.

„Hér í Dölum er mikil eftirvænting fyrir þessu verkefni og stundum hefur verið eðlileg óþreyja. En nú hafa orðið hér kaflaskil og allt er að fara í gang og við fáum mannvirkið í okkar umsjón fullfrágengið 4. febrúar 2026. Þetta er samfélagsverkefni sem mun styrkja innviði okkar hér í Dölunum til muna,“ segir Bjarki Þorsteinsson sveitarstjóri í Dalabyggð.