Hringekja Mikið var um að vera í miðbænum og í Hljómskálagarðinum á 17. júní, sér í lagi fyrir yngstu kynslóðina.
Hringekja Mikið var um að vera í miðbænum og í Hljómskálagarðinum á 17. júní, sér í lagi fyrir yngstu kynslóðina. — Morgunblaðið/Eyþór
Austurstræti Múgur og margmenni var í Austurstræti þegar best lét í hátíðarhöldunum í borginni í gær og hátíðarhugur í höfuðborgarbúum.
Hafnarfjörður Farið var í veglega skrúðgöngu í Hafnarfirði og leiddi hana Lúðrasveit Hafnarfjarðar venju samkvæmt.
Húsavík Mikil hátíðarhöld voru á Húsavík í gær og var Kristín Elísa Sigurðsson útnefnd listamaður Norðurþings 2024.
Reykjavík Fjölmenni var í miðbæ Reykjavíkur vegna hátíðarhaldanna og var yngri kynslóðin þar í sérstöku fyrirrúmi.
Hrafnseyri Lilja D. Alfreðsdóttir, menningar- og viðskiptaráðherra, ávarpaði þjóðhátíðarsamkomu á Hrafnseyri.
Laxamýri Vel viðraði á Norðausturlandi í gær og því var tækifærið gripið til að setja út kýrnar sem fögnuðu þjóðhátíðinni vel.
[ Smellið til að sjá stærri mynd ]
Fjölbreytt dagskrá var um land allt er Íslendingar fögnuðu þjóðhátíðardeginum og 80 ára afmæli lýðveldisins í gær. Hátíðardagskráin í Reykjavík hófst formlega á Austurvelli þegar Guðni Th. Jóhannesson, forseti Íslands, lagði blómsveig að styttu Jóns …

Fjölbreytt dagskrá var um land allt er Íslendingar fögnuðu þjóðhátíðardeginum og 80 ára afmæli lýðveldisins í gær.

Hátíðardagskráin í Reykjavík hófst formlega á Austurvelli þegar Guðni Th. Jóhannesson, forseti Íslands, lagði blómsveig að styttu Jóns Sigurðssonar og Bjarni Benediktsson forsætisráðherra flutti hátíðarávarp.

Hátíðarhöldin í miðbæ Reykjavíkur hófust svo með skrúðgöngu frá Hallgrímskirkju niður að hátíðarsvæðinu í Hljómskálagarði þar sem var fjölbreytt dagskrá fyrir Reykvíkinga, unga sem aldna.

Stíf dagskrá var í Hafnarfirði en hátíðarhöldin hófust klukkan átta að morgni. Dagskráin hófst með fánahyllingu í boði Skátafélagsins Hraunbúa og lauk síðan um tíu að kvöldi með tónlistarveislu á Thorsplani.

Þjóðhátíðardagur Grindvíkinga var með öðruvísi sniði en að venju en í tilefni dagsins var myndlistarsýningin „… að allir séu óhultir“ opnuð í Safnahúsinu þar sem Grindvíkingar komu saman og fögnuðu deginum.

Ekki voru hátíðarhöld einskorðuð við höfuðborgarsvæðið því skemmtidagskrá og skrúðgöngur voru um allt land.

Að venju var sól og blíða á Akureyri í gær. Hátíðarhöldin hófust með skrúðgöngu frá Gamla húsmæðraskólanum í Lystigarðinum þar sem var líf og fjör fram eftir degi.

Á Hrafnseyri, fæðingarstað Jón Sigurðssonar, flutti Lilja Alfreðsdóttir, menningar- og viðskiptaráðherra, hátíðarávarp og var opin smiðja fyrir börn út daginn þar sem þau fengu að prófa að vera forseti Íslands.