Áður óþekkt steind, sem fannst á Fimmvörðuhálsi árið 2010, hefur verið samþykkt sem ný tegund af Alþjóðasteindafræðisambandinu. Steind er nokkurs konar byggingareining bergs en hin nýja tegund nefnist kristjánít, eftir Kristjáni Jónassyni jarðfræðingi, en hann fór í rannsóknarleiðangur ásamt starfsbróður sínum, Sigmundi Einarssyni, í kjölfar eldsumbrotanna á Fimmvörðuhálsi og í Eyjafjallajökli.
Frá þessu er greint á vef Náttúrufræðistofnunar Íslands. Fóru Kristján og Sigmundur á vettvang eldsumbrota til að leita að útfellingum í nýmynduðum gígum og hrauni. Tóku þeir m.a. sýni af hvítum og grænleitum útfellingum sem fundust undir skorpu af gjósku úr Eyjafjallajökli utan í gígnum Magna. Hitastig í gjallinu mældist 670°C.
Sýnið var sent til háskólans í Kaupmannahöfn ásamt fleiri sýnum og greint af dr. Tonci Balic-Žunic, prófessor í steindafræði. Þar var þessi nýja tegund greind og lýsing hennar birtist nýverið í tímaritinu Mineralogical Magazine.
Á vef Náttúrufræðistofnunar segir ennfremur að kristjánít sé ekki fyrsta steindin sem nefnd er eftir Íslendingi. Áður hafa verið samþykktar steindirnar jakobssonít og óskarssonít, sem voru nefndar eftir Sveini Jakobssyni, jarðfræðingi á Náttúrufræðistofnun, og Níelsi Óskarssyni, jarðfræðingi á Norrænu eldfjallastöðinni. Þá hafa tvö íslensk eldfjöll fengið steindir nefndar eftir sér, Eldfell og Hekla. bjb@mbl.is
Til baka
Leita í greinasafni
Prenta grein