Hljómsveitin Osme heldur 12 klukkutíma sumarsólstöðutónleika á Innsævi, menningar- og listahátíð Fjarðabyggðar, á morgun, 21. júní. Tónleikarnir fara fram í Sköpunarmiðstöðinni Stöðvarfirði, frá klukkan 12 á hádegi til miðnættis.
„Osme er nýleg hljómsveit og kennir sig við stefnu sem þeir kalla hugleiðsluþungarokk og hafa hingað til spilað ferna tónleika og voru þeir fyrstu á Norðanpaunki á Laugarbakka þar sem Osme opnaði hátíðina í ágúst 2023. Meðlimir Osme hafa verið viðloðandi tónlist í nokkra áratugi og leggja mikið upp úr sviðsframkomu og tilfinningu í allri sinni framsetningu og flæði. Hljómsveitina skipa þeir Benedikt Reynisson, Helgi Örn Pétursson og Þórður Bjarki Arnarson og hefur hún einnig haldið tónleika í Elliðaárstöð, Smekkleysu og R6013,“ segir í tilkynningu.
Þessi gjörningur krefst mikils úthalds og undirbúnings og verður öðru tónlistarfólki úr Fjarðabyggð boðið að vera með. Gestum er frjálst að koma og fara að vild en aðgangur er ókeypis.
Til baka
Leita í greinasafni
Prenta grein