Víkingur úr Reykjavík mun mæta Sparta Prag frá Tékklandi í 2. umferð undankeppni Meistaradeildar Evrópu í knattspyrnu karla ef liðið vinnur Shamrock Rovers frá Írlandi í 1. umferð.
Dregið var í 2. umferð í höfuðstöðvum UEFA í Nyon í Sviss í gær. Sigur í 1. umferðinni gegn Shamrock tryggir Víkingum jafnframt a.m.k. sæti í 3. umferð undankeppni Evrópudeildar og um leið úrslitaleik um sæti í riðlakeppni Evrópudeildar eða Sambandsdeildar, en það er nákvæmlega sú leið sem Breiðablik fór í fyrra.
Ef Víkingar tapa fyrir Shamrock Rovers færast þeir yfir í 2. umferð undankeppni Sambandsdeildar og mæta þá tapliðinu úr einvígi Borac Banja Luka frá Bosníu og Hersegóvínu og Egnatia frá Albaníu í 1. umferð undankeppni Meistaradeildar, en einnig var dregið í 2. umferð undankeppni Sambandsdeildar í gær.
Valur mætir skoska liðinu St. Mirren í 2. umferð Sambandsdeildarinnar ef liðið vinnur Vllaznia frá Albaníu í 1. umferðinni.
Valsmenn hefðu getað mætt FC Köbenhavn, þar sem Orri Steinn Óskarsson og Rúnar Alex Rúnarsson spila, eða Go Ahead Eagles, þar sem Willum Þór Willumsson spilar.
Breiðablik mætir Drita frá Kósovó í 2. umferð ef liðinu tekst að slá út Tikvesh frá Norður-Makedóníu í 1. umferðinni.
Stjarnan mætir þá Bala Town frá Wales eða Paide Linnameeskond frá Eistlandi í 2. umferð ef liðinu tekst að vinna Linfield frá Norður-Írlandi í 1. umferð.