Miðflokkurinn mælist með 14,5% fylgi í nýjustu könnun Gallup. Aldrei áður hefur stuðningur við flokkinn mælst jafn mikill. Formaður flokksins telur kosningar vera á næsta leiti.
„Við höfum ekki reynt að elta kannanir heldur haldið okkar striki, þegar gengur vel og illa. Auðvitað gleðst maður yfir því þegar hlutirnir eru í rétta átt en heldur sínu striki,” segir Sigmundur Davíð Gunnlaugsson formaður Miðflokksins.
Í niðurstöðum Þjóðarpúls Gallup, sem ríkisútvarpið greindi frá í gær, mælist fylgi Samfylkingarinnar enn mest allra þingflokka, eða um 26,9%. Flokkurinn tapar þó þremur prósentustigum á milli kannana. Sjálfstæðisflokkurinn mælist með næstmesta fylgið eða 18,5%. Þar á eftir kemur Miðflokkurinn með 14,5%, Viðreisn með 9,4%, Píratar með 8,8% og Flokkur fólksins með 7,7%.
Ríkisstjórnarflokkarnir Framsókn og Vinstri græn reka lestina með 6,6% og 4% fylgi, ásamt Sósíalistaflokknum sem mælist með 3,5% fylgi.
Löngu kominn tími á kosningar
Sigmundur Davíð segir fylgi Miðflokksins hafa verið í lægð meðan kórónuveirufaraldrinum stóð.
„En nú er stjórnmálaumræðan byrjuð aftur á Íslandi og veitir ekki af – þær aðstæður sem henta okkur. Við erum með stefnu og viljum gjarnan að það sé rætt um landsins gagn og nauðsynjar, hvernig megi gera hlutina betur.”
Er kominn tími á kosningar?
„Ég held að það sé löngu kominn tími á kosningar en ég held að það sé einmitt þessi staða ríkisstjórnarinnar, það er að segja lítið fylgi hennar, sem hefur komið í veg fyrir kosningar. Þessir flokkar væru allir löngu orðnir fegnir að losna úr þessu samstarfi en enginn þeirra þorir það á meðan fylgið þeirra er eins og það er,” segir Sigmundur.
Hvað er það helsta sem Miðflokkurinn myndi leggja áherslu á ef kosið yrði eftir nokkra mánuði?
„Það eru hlutir eins og efnahagsmálin, það er að segja rekstur ríkisins, og það eru orkumálin og útlendingamálin. Þessum hlutum þarf að koma í lag því allt annað tengist þessu. Allt annað tengist útlendingamálunum. Húsnæðismarkaðurinn, heilbrigðiskerfið, menntakerfið. Allt það er háð því að takist að ná stjórn á ástandinu í hælisleitendamálunum.”