Lítið sem ekkert eftirlit er með kennslu í íslenskum grunnskólum og er námskráin sem kennarar vinna eftir óskýr. Engar samræmdar mælingar eru gerðar á frammistöðu grunnskólanema og geta einkunnir oft gefið skakka mynd af raunverulegri hæfni þeirra.
Þetta segir Jón Pétur Zimsen, aðstoðarskólastjóri Réttarholtsskóla, í nýjasta þætti Dagmála sem kom út í morgun.
Rúmt hálft ár er liðið frá því niðurstöður PISA-könnunar ársins 2022 voru kunngjörðar. Samkvæmt þeim búa aðeins um 60% nemenda yfir grunnhæfni í lesskilningi við útskrift úr tíunda bekk. Þá búa að meðaltali 66% nemenda yfir grunnhæfni í stærðfræðilæsi og 64% nemenda yfir grunnhæfni í læsi á náttúruvísindi.
Barna- og menntamálaráðuneytið vinnur að aðgerðaáætlun til að bregðast við niðurstöðunum. Þá var Menntamálastofnun lögð niður og nýrri stofnun komið á laggirnar.
Jón Pétur segir niðurstöðurnar ekki koma á óvart heldur séu þær í takt við þróun síðustu ára. Þá býst hann við enn verri niðurstöðum árið 2025, þegar þær næstu verða kynntar, enda telur hann engar raunverulegar breytingar í farvatninu sem séu líklegar til að bera árangur.
Jón Pétur ræðir um þá stöðuna sem upp er komin í íslensku menntakerfi, hugsanlegar lausnir þar á og áskoranirnar sem blasa við nemendum, í Dagmálum.