Norður
♠ --
♥ ÁDG2
♦ 542
♣ Á108542
Vestur
♠ K7
♥ K1098653
♦ D86
♣ 6
Austur
♠ ÁD8653
♥ 4
♦ KG1093
♣ 9
Suður
♠ G10942
♥ 7
♦ Á7
♣ KDG73
Suður spilar 7♣.
„Ekki eitt einasta par spilaði sex lauf!“ Magnús mörgæs er ekki tilfinningasamur maður en þetta spil Evrópumótsins kom honum verulega á óvart. Algengasti samningurinn í opna flokknum var 3♥ í vestur, einn niður. Hvað kom til?
Skýringin er í sjálfu sér einföld: Suður opnaði á 1♠, vestur hindraði í 3♥ og norður gildrupassaði. Suður á ekki sterka opnun en flestir dobluðu þó af skyldurækni og norður passaði glaður.
Ekkert par náði 6♣ en eitt par komst í 7♣! Þar voru á ferð Færeyingarnir Arne Mikkelsen og Simun Lassaberg í leik við Frakka. Arne kaus að opna á laufi frekar en spaða. Vestur sagði 3♥ og þegar sú sögn kom aftur til suðurs vildi Arne ekki þegja lengur yfir spaðalitnum og sagði 3♠. Simun sá ekki að hann kæmist langt í vísindalegum rannsóknum og tók einfaldlega stangarstökk í sjö! Þrettán slagir með svíningu í hjarta.