Tvö af málgögnum kínversku stjórnarinnar réðust um miðjan júli 1964 harkalega á Nikita Krúsjeff leiðtoga Sovétríkjanna. Blöð þessi voru „Dagblað þjóðarinnar“ og „Rauði fáninn“, og sögðu þau að Krúsjeff berðist fyrir því að innleiða auðvaldsstefnuna í Sovétríkjunum og að hann væri leiðtogi nýrrar forréttindastéttar borgaranna í andstöðu við verkalýðinn, að því er fram kom í Morgunblaðinu.
„Greinar þessar eru skrifaðar með tilvísun til opins bréfs kommúnistaflokks Sovétríkjanna frá 14. júlí í fyrra, og er fyrirsögnin í báðum blöðunum: „Um hinn falska kommúnisma Krúsjeffs og sögulegar kenningar hans fyrir heiminn". Er þar „endurskoðunarklíka Krúsjeffs“ sökuð um að hafa afnumið einræði öreiganna og rutt brautina fyrir endurreisn auðvaldsfyrirkomulagsins. Blöðin vísa á bug þeirri „fáránlegu skoðun“ að ekki sé lengur um neina stéttabaráttu að ræða í Sovétríkjum,“ sagði Mogginn.