Ný stuttmynd leikstjórans Rúnars Rúnarssonar, O, eða Hringur, hefur verið valin til að keppa um aðalverðlaun í flokki stuttmynda Kvikmyndahátíðar í Feneyjum. Alverto Barbera, listrænn stjórnandi hátíðarinnar, greindi frá fyrstu myndunum sem búið er að velja fyrir hátíðina í haust. Þetta kemur fram í tilkynningu.
O er fjórða stuttmynd Rúnars og fer Ingvar Sigurðsson með aðalhlutverkið. Í tilkynningunni segir að myndin sé ljóðræn frásögn af manni sem vill standa sig en hans helsta hindrun sé hann sjálfur.
Hátíðin er ein af elstu kvikmyndahátíðum í heiminum. Verður hún haldin í áttugasta og fyrsta skiptið í ár.
„Við erum náttúrulega voðalega ánægð með þennan heiður sem myndirnar okkar hafa hlotið. Þetta er mikið til sama fólkið á bak við myndavélina og það sem kemur bæði að O og Ljósbroti. Við erum ótrúlega stolt af og þakklát þessu fólki. Þessi vegferð sem O og Ljósbrot eru á er einnig gríðaleg viðurkenning fyrir íslenska kvikmyndagerð. Fyrir það mikla starf sem stjórnvöld og einkaaðilar hafa unnið undanfarin ár erum við þakklát,“ er haft eftir Rúnari í tilkynningu, en hann leikstýrði myndinni, skrifaði handrit hennar og framleiddi.
„Við hlökkum til að frumsýna myndirnar heima á Íslandi. Við byrjum á Ljósbroti um miðjan ágúst í samstarfi við Sambíóin. Þó að myndin hafi fengið upphefð erlendis þá erum við að gera mynd fyrir íslenska áhorfendur, mynd sem gerist í íslenskum veruleika. Húmor flyst ekki alltaf á milli landa. Við erum svolítið spennt að heyra hve mikið Íslendingar hlæja og hvar miðað við áhorfendur í Cannes,“ er haft eftir Heather Millard sem framleiddi myndina ásamt Rúnari.
Til baka
Leita í greinasafni
Prenta grein