Líkur á eldingum vestanlands í dag

Líkur eru á eldingum vestanlands seinni partinn í dag samkvæmt veðurspá Veðurstofu Íslands fyrir daginn.

Í samtali við Morgunblaðið segir Marcel de Vries, veðurfræðingur hjá Veðurstofunni, það alla jafna erfitt að spá fyrir um eldingar á Íslandi. Hann segir eldingar oft fylgja hellidembu sem er spáð á morgun.

„Það er möguleiki á að það komi eldingar líka, það er ótrúlega erfitt að spá fyrir um eldingar á Íslandi,“ segir hann. Marcel segir að skúrir muni myndast vestanlands seinnipartinn í dag og að á einhverjum stöðum geti orðið hellidemba.

Skriður ólíklegar

Aðspurður segist hann ekki búast við aurskriðum í kjölfar úrkomunnar. Rigningin muni standa yfir í stuttan tíma og á afmörkuðu svæði. Aurskriður séu algengari þegar meiri úrkoma er á stærra svæði eins og gerðist um seinustu helgi segir hann.

Síðastliðna helgi var slegið úrkomumet í Grundarfirði en gular veðurviðvaranir voru víða í gildi. Að minnsta kosti fimm skriður féllu yfir helgina en til­kynnt var um skriður í Döl­um, á Barðaströnd, Snæ­fellsnesi og í Hít­ar­dal á Mýr­um. Ein skriðan lokaði vegi í Svínadal í Dölum og voru vatnavextir miklir á Vesturlandi.

Að öðru leyti spáir Veðurstofan hægri eða breytilegri átt en sums staðar 5 til 10 metrum á sekúndu á annesjum. Spáð er að hiti verði 6 til 20 stig í dag, hlýjast á Norðvesturlandi, en svalast við austurströndina.

Marcel segir að lokum að þrátt fyrir að veðrið sé leiðinlegt sé það nokkuð tíðindalítið þessa dagana.