Bera fyrir sig breytingar og nýja stofnun

Skýrsla um framkvæmd skólastarfs í grunnskólum árin 2017 til 2021 tafðist vegna breytinga innan Stjórnarráðsins og mennta- og barnamálaráðuneytisins, sem og á framkvæmd verkefna vegna tilkomu Miðstöðvar menntunar og skólaþjónustu.

Þetta kemur fram í svari menntamálaráðherra til Morgunblaðsins.

Ráðherra lofaði umboðsmanni barna fyrir rúmum tveimur árum að leggja fram skýrsluna fyrir lok árs 2022.

Í svari til mbl.is segir að drög að skýrslunni liggi fyrir í ráðuneytinu og að hún sé á þingmálaskrá til fyrirlagningar á haustþingi.

Engin skýrsla í rúm fimm ár

Mennta- og barnamálaráðherra hefur ekki lagt fram skýrslu um framkvæmd skólahalds í grunnskólum síðan í janúar árið 2019. Tók sú skýrsla til skólaáranna 2010 til 2016.

Samkvæmt lögum um grunnskóla ber ráðherra á þriggja ára fresti að leggja fram á Alþingi skýrslu um framkvæmd skólastarfs í grunnskólum landsins sem byggist m.a. á skýrslum sveitarfélaga um skólahald.

Umboðsmaður barna sendi ráðherra bréf í apríl 2022 þar sem hann lagði áherslu á að brýnt væri að ný skýrsla yrði sem fyrst lögð fram. Ráðuneytið svaraði í byrjun maí sama ár þar sem fullyrt var að ráðherra myndi leggja fram skýrsluna fyrir lok ársins.

Sú skýrsla hefur ekki enn verið lögð fyrir Alþingi og ítrekaði því umboðsmaður erindi sitt með bréfi til ráðherra í síðasta mánuði.

Hafa lagt mikinn metnað í menntastefnu

Í fyrirspurn Morgunblaðsins til ráðherra var óskað eftir svörum við því hvers vegna útgáfa skýrslunnar hefði dregist svo á langinn og hvenær mætti gera ráð fyrir því að hún yrði lögð fram fullgerð.

„Drög að skýrslu um framkvæmd skólastarfs í grunnskólum fyrir árin 2017-2021 liggja fyrir í ráðuneytinu. Skýrslan er á þingmálaskrá til fyrirlagningar á haustþingi 2024. Tafir urðu á útgáfu hennar m.a. vegna breytinga, innan Stjórnarráðsins og ráðuneytisins, sem og á framkvæmd verkefna með tilkomu nýrrar stofnunar,“ segir m.a. í svarinu.

„Ráðuneytið hefur lagt mikinn metnað í menntastefnu til ársins 2030 og aðgerðaáætlun hennar, sem hefur það að markmiði að á Íslandi verði menntakerfið framúrskarandi þegar hrint hefur verið í framkvæmd öllum þeim menntaumbótum sem þurfa þykir.“

Tjá sig ekki um skoðanir einstakra starfsmanna

Arnór Guðmundsson, fyrrverandi forstjóri Menntamálastofnunar, sagði í viðtali við Morgunblaðið hinn 27. júlí að gæðamálum væri ábótavant í menntakerfinu.

Þá gagnrýndi hann að ráðuneytið hefði ekkert gert við niðurstöður skýrslu sem Menntamálastofnun tók saman eftir að hafa lokið við ytra mat á öllum grunnskólum landsins.

Óskaði Morgunblaðið eftir svörum við því hvernig ráðherra hefði brugðist við niðurstöðum skýrslunnar sem Arnór vitnaði í.

Í svari ráðherra segir að skýrslan, eins og aðrar, sé höfð til hliðsjónar í störfum ráðuneytisins.

„Mennta- og barnamálaráðuneytið vinnur að gerð nýs námsmats sem mun koma í stað samræmdra könnunarprófa samkvæmt tillögum starfshóps skipuðum fulltrúum skólasamfélagsins. Ástæður afnáms samræmdra könnunarprófa koma m.a. fram í skýrslu starfshópsins og í fréttaflutningi ráðuneytisins um hið nýja námsmat. Ráðuneytið tjáir sig ekki um skoðanir einstakra starfsmanna,“ segir að lokum í svari ráðherra.