Skoruðu fimm á 50 mínútum

Víkingur úr Reykjavík skoraði fimm mörk á fimmtíu mínútum þegar liðið tók á móti Tindastóli í 17. umferð Bestu deildar kvenna í knattspyrnu í Fossvoginum í gær.

Leiknum lauk með stórsigri Víkings, 5:1, en Linda Líf Boama skoraði tvívegis fyrir Víkinga á fyrstu sex mínútum leiksins. Víkingar bættu við tveimur mörkum til viðbótar um miðjan síðari hálfleikinn áður en Shaina Ashouri bætti við fimmta markinu í upphafi síðari hálfleiks.

Með sigrinum jöfnuðu Víkingar lið Þór/KA að stigum og eru nýliðarnir komnir í fjórða sæti deildarinnar eftir brösótta byrjun á tímabilinu.

Tindastóll er hins vegar áfram í áttunda sætinu með 12 stig og hefur þriggja stiga forskot á Fylki, sem er í níunda sætinu og á leik til góða á Sauðkrækinga.

 Linda Líf Boama hefur skorað fimm mörk í 10 leikjum í sumar og er markahæsti leikmaður Víkinga ásamt Hafdísi Báru Höskuldsdóttur og Shainu Ashouri.

 Þetta var þriðji sigurleikur Víkinga í röð og hefur liðið fengið 13 stig af 15 mögulegum úr síðustu fimm leikjum sínum.

Sandra hetjan á Akureyri

Sandra María Jessen bjargaði stigi fyrir Þór/KA þegar liðið tók á móti Stjörnunni á Akureyri en leiknum lauk með jafntefli, 2:2.

Akureyringar komust yfir í leiknum en Garðbæingar svöruðu og komust í 2:1. Á 82. mínútu átti Hulda Ósk Jónsdóttir frábæra sendingu frá hægri og Sandra María var rétt kona á réttum stað og skallaði boltann í stöngina og inn.

Jafntefli gerir lítið fyrir bæði lið og er Þór/KA nú í þriðja sætinu, 14 stigum á eftir toppliði Vals, og 13 stigum á eftir Breiðabliki en toppliðin eiga bæði leik til góða á Akureyringa.

Stjarnan fór upp fyrir Þrótt úr Reykjavík að stigum og er nú í sjötta sætinu með 21 stig en Þróttarar eiga leik til góða á Garðbæinga sem eiga það á hættu að enda í neðri hluta deildarinnar.

 Sandra María skoraði sitt 18. mark í deildinni í 17 leikjum og er langmarkahæst en Sauðkrækingurinn Jordyn Rhodes er næstmarkahæst með 10 mörk.

 Eftir góða byrjun á mótinu hefur Þór/KA aðeins fengið 5 stig af 15 mögulegum úr síðustu fimm leikjum sínum.

Ótrúleg endurkoma FH

Það var sannkölluð markaveisla suður með sjó þegar Keflavík tók á móti FH í Keflavík en leiknum lauk með ótrúlegum sigri Hafnfirðinga, 4:3.

Keflavík leiddi með þremur mörkum í hálfleik, 3:0, en FH tókst að snúa leiknum sér í vil í síðari hálfleik og Breukelen Woodard skoraði sigurmarkið með frábæru skoti, rétt utan teigs, og tryggði FH ótrúlegan sigur.

Hafnfirðingar fjarlægðust neðri hlutann með sigrinum og eru með 25 stig í fimmta sætinu en Keflavík er sem fyrr í tíunda og neðsta sæti deildarinnar með 9 stig.

 Þetta var annar sigur Hafnfirðinga í röð en Keflavík var að tapa sínum fimmta leik í röð.